थीथी थासं नेपाल संवत न्हूदँया हसना
नेपाल संवत् ११३१ न्हूदँ क्यंगु लसताय् थीथी थासं हसना वयेगु झ्वः न्ह्याःगु दु । थ्वहे झ्वलय् प्रधानमन्त्री माधवकुमार नेपालं न्हूदँया लसताय् सकल नेपाःमिपिंत भिंतुना बियादीगु दु ।
प्रधानमन्त्री नेपालं छगू विज्ञप्ति पिथना नेपाःया मौलिक संवत् नेपाल संवत् शंखधर साख्वलं गरिबतय् त्यासाः पुलाः न्ह्याकूगु संवत् जूगु न्ह्यथंसें थुकीं समानताया पलिस्था व विपन्नतय् सम्मना नापं सामाजिक सद्धभाव पलिस्थाय् बः बीगु खँ न्ह्यथनादिगु दु । अथेहे थुगु प्रेरणा फुकसिनं थौंया दिनय् कायेफयेमाः धकाः नं कामना यानादीगु दु ।
उखे नेवाःतय् राष्ट्रिय संगठन नेवाः देय् दबूलिं नेपाल संवत् ११३१ न्हूदँया लसताय् सकल नेपाःमिया सम्बृद्धि, प्रगति व भिंउसाँय्या कामना याःगु दु ।
देय् दबूया नायः नरेश ताम्राकारं पिथनादीगु विज्ञप्तिइ थुगु न्हूदँलय् संघीय लोकतान्त्रिक गणतन्त्रयात संस्थागत यानाः न्हूगु संविधानय् नेवाःतय्गु पहिचान सहितया नेवाः स्वायत्त राज्य प्रापित्या निंतिं छधी जुयाः न्ह्याये फयेमाः धइगु नं मनतुनादीगु दु ।
उकथं हे न्हूदँया लसताय् वर्ल्ड नेवाः अर्गनाइजेशनपाखें नं भिंतुना सन्देश प्राप्त जूगु दु । अर्गनाइजेशन तदर्थ समितिया नायः दया शाक्य, न्वकुपिं त्रिभुवन तुलाधर, डा. बालगोपाल श्रेष्ठ, सुवन वज्राचार्य व दुजःपुचलं व्छया हःगु भिंतुना पतिइ हलिमय् न्यना च्वंपिं सकल नेवाःतय्त छधि छप्पं यायेगु ज्याय् जक मखु नेवाः दशक नेपाल संबत ११३१ - ११४० सुथां लाकेगु मू आज्जु ज्वनाः न्हयाः वने त्यंगु डब्लुएनओया ज्याझ्वलय् ब्वति कयाः सफल यानाः नेपालमण्डल देशय् च्वंपिं दाजु किजा तता केहे पिन्त हःपाः बियाः बल्लाकाः वनेगु नं कुतः यानाः न्ह्याबलें न्हयचिलाः च्वने फयेमा धकाः नं न्ह्यथना तःगु दु ।
अथेहे जापानया निंतिं नेपाली राजदूत डा. गणेश योञ्जन तामाङ्गं नं छगू विज्ञप्ति पिथनादिसें न्हूदँया भिंतुना बियादीगु दु । वय्कलं थुगु लसताया इलय् राष्ट्रिय संस्कृति, सम्पदा, सभ्यता, पर्व व परम्पराया जगेर्ना यासें राष्ट्रिय एकता, अखण्डता, समभदारी, सहिष्णुता व समृद्धिया दिशाय् समर्पित जुइत सकल जापानवासी नेपाःमितय्त इनाप यानादीगु दु ।
