न्हूदँया लसताय् यलय् सीमत याः

न्हूदँ ने.सं. ११३१ या लसताय् थौं यलय् सीमत याः ज्याझ्वः जुल । सीमतयाः यलया मंगलबजारं न्ह्यानाः हःखाः, सौगः, नुगः, उकुबहाः, इति, इखालखु, पूर्णचण्डी, गाःबहाः, पूच्व, छाय्बहाः, पिम्बहाः, स्वनीम्ह, मिखाबहाः, बालिफः, नःबही, क्वालखु, क्वन्ति क्वबहाः, स्वथः जुयाः मंगलबजारय् क्वचाल । सीमत याः न्ह्यः जूगु ज्याझ्वलय् मूपाहां समाजसेवी मोतिलाल सिल्पकारं न्हूदँ ११३१ या लसताय् भिन्तुना देछासें छेँ छँय् थः मस्तय्त मांभाय् स्यनेमाःगु व अथे जूसा जक मांभाय् ल्यनीगु खँ कनादिल । ज्याझ्वलय् नेपालभाषा मंकाः खलःया नायः नापं न्हूदँ हना ग्वसाः खलःया कजि सुरेश प्रधानं स्वन्तिया इलय् जक तिथि स्यनीगु व थुकिं नेवाःतय्त विखण्डन यायेफूगुलिं थजाःगु तत्वपाखें सचेत जुइमाःगु खँ कनादिल । उगु ज्याझ्वलय् कात्ति प्याखंया स्यनामि पात्रवंश केशब कृष्ण श्रेष्ठयात मूपाहां मोतिलाल शिल्पकारपाखें हनेज्या जूगु खः । रोट्रायक्ट क्लब अफ यल, रोट्रायक्ट क्लब अफ पाटन, रोट्रायक्ट क्लब अफ ललितपुर, पाटन जुनियर जेसिस व लियो क्लब अफ मणिगलया मंकाः ग्वसालय् जूगु उगु ज्याझ्वः भाजु मुरज बज्राचार्यया सभापतित्वय् जूगु खः । ज्याझ्वलय् थी थी साँस्कृतिक ब्वज्या नं जूगु खः ।

More Stories Like this