झीगु नखः झी कथं हे हने

न्हुछेकाजी महर्जन

भारतपरस्त बाहुनवाद पंचाङ्ग समिति गुब्ले नेपाःया संघीय व्यवस्थानाप ज्वःलायेक ज्यायाइ मस्यू, तर नेपाः सरकारया लागिं सदां छ्यं स्याइगु जुयाच्वनंनं नेपाःया सरकारं उगु पंचाङ्ग समितियात छुं नं कथंया कारवाही याये फयाच्वंगु मदु, छाय् ? बाहुनवाद परस्त जुयाच्वंगुलिं कि, भारतपरस्त जुया च्वंगुलिं कि, अझ नं व समिति राजतन्त्रया नवः दनिगुलिं कि वा नेपाःया सरकारं निर्देशन मब्यूगुलिं कि बी मफुगुलिं कि पंचाङ्ग समिति नेपाः सरकारया दुने मखु कि थुपिं यावत न्ह्यसःया लिसः बी मफयाच्वंम्ह नेपाः सरकारं मेगु छु याइ धका विश्वास कायेगु ?

दँय्दसं नेवाः तयेगु तिथियात अलमलयाना घडिपलाया नामय् नखःचख स्यंकेगु याना च्वनीगु पंचाङ्ग समितियात नेपाः सरकारं लोकतान्त्रीकरण कथं समावेशी छाय् याये मफया च्वंगु ? न्हाय्पं व दिमाग दुम्ह सरकार खः धइगु जूसा याकनं हे पंचाङ्ग समितियात नं समावेशीयाना समावेशी कथं हे पात्रो पिथने माल, मखु धइगु जुसा दँय्दसं पंचाङ्ग समितिया क्वःछिनाया अःखः छाय् नेवाः समुदायया दवावं न्ह्याबलेँ थप बिदा बीत सरकार बाध्य जुया च्वनेमाःगु ? थथे छगू संस्थाया क्वःछिना बाध्य जुइमाःगु सरकारं न्हूगु संविधान दयेकेत क्वातुगु पलाः न्ह्याकि धइगु शंकाया विषय खः । लुमंकेबहःगु खँ थगुने नं थथे जुया नेपाः सरकारं छन्हु थप बिदा बीमाःगु खः ।

थौं तक झी नेवाःतय्सं छुं नं ज्यायायेत साइत स्वइगु म्हो जक हे खः । सुर्ध्य: लुइगु तिथियात हे न्हि कथं कया झीसं परम्परा न्ह्याकाः वयाच्वनागु दु । उकिं थुगुसिया स्वन्ति नखःयातनं पंचाङ्ग समितिं विवादय् लाकाब्यूगु दु । न्हापा जुजुया किजापुजायात साइत कया तिथि मिले याइगु खःसा आः सुयागु किजापुजायात आधार कया तिथि मिलेयाःगु मस्यु तर जिं स्यू कथं प्रत्येक मनूया साइत अलग अलग हे जुई । उकिं सुयागुं साइतय् सकसियां वहे ज्या याये माः धैगु मदु । झीगु परम्परा कथं झीसं नखः हने दयेमाः । थ्व हे झीगु तातुना खः । उकिं पंचाङ्ग समितिया क्वःछिना कथंयात स्वःसां सुर्ध्य: लुइगु तिथि धैगु ने.सं.११३० कौलागा आमै (कार्तिक २० गते/6th November,2010), शनिवा: हे लक्ष्मीपुजा याये माःसा नेपाल संवत् ११३१ कछलाथ्व पारु (कार्तिक २१ गते/7th November,2010), आइतवा: कुन्हु न्हूदँ व म्हपुजा यायेगु जुइसा ने.सं. ११३१ कछलाथ्व दुतिया (कार्तिक २२ गते/8th November,2010), सोमवा: कुन्हु किजापुजा यायेगु जुई धका सकल नेवाः संघसंस्था नापं प्रमुख राजनीतिक पार्टीतय्सं नं उकथं हे स्वन्ति नखः हनेगु ज्याझ्वः दयेकूगु दु । लुमंकेबहःगु खँ छु धायेबलय् पंचाङ्ग समितिया निर्णय (क्वःछिना)य् गनं नं म्हपुजाया तिथि थुबलय् धकाः तयातःगु मदुसा किजापुजायात सुं छम्ह शासक व्यक्तियागु साइतय् हे यायेमा धइगु प्रचलनयात झीसं थ्व दासत्ववाद बाहुनवाद् अतिवाद् धायेगु बाहेक मेगु छुं मखु । झीसं झीगु नखः झीगु परम्परा कथं हे हने सुर्ध्य: लुइगु तिथि हे झीगु न्हि खः उकिं ने.सं.११३० कौलागा आमै (कार्तिक २० गते/6th November,2010), शनिवा: हे लक्ष्मीपुजा, नेपाल संवत् ११३१ कछलाथ्व पारु (कार्तिक २१ गते/7th November,2010), आइतवा: कुन्हु न्हूदँ व म्हपुजा व ने.सं. ११३१ कछलाथ्व दुतिया (कार्तिक २२ गते/8th November,2010), सोमवा: कुन्हु किजापुजा यानां स्वन्ति नखः हने सुयागुं दासत्व स्वीकार मयाये थ्वहे ने.सं. ११३१ न्हूदँ व स्वन्ति नखःया सकल नेपाःमिपिंत दुनुगलंनिसें भिन्तुना ।

More Stories Like this