नेपालभाषाया थी थी म्येचा सिडिया पितब्वज्या जुल

न्हूदँ ने.सं. ११३१ या लसताय् नेपालभाषाया म्येचाः पिथनेगु सफू पिकायेगु लिसें थी थी ज्याझ्वः यायेगु ज्या न्हियांन्हिथं अप्वयाः वःगु खनेदु । थ्वहे झ्वलय् थौ नेपालभाषाया थी थी सिडि पितब्वज्या जूगु दु । ज्यापू समाज यलया ज्यापू प्रज्ञा भवनय् थौं नेपालभाषाया नांजाःम्ह लय् चिनामि मनराजा नकःमिया 'सिमाकचा' सिडि पितब्वज्या जुल । नेपालभाषाया नांजाःम्ह म्येहालामि नापं वरिष्ठ कलाकार भृगुराम श्रेष्ठया ल्हातिं छगू ज्याझ्वःया दथुइ पितब्वज्या जूगु खः । डेल्टा मल्टिमिडिया प्रोडक्सनया प्रोप्राइटर भाइकाजी महर्जन 'नयन'या सभापतित्वय् जूगु उगु ज्याझ्वलय् मूपाहां भृगुराम श्रेष्ठ, म्येहालामि जुजकाजी रंजितं नेपालभाषाया ख्यलय् साहित्य व कलाकार उपेक्षित जुयाच्वंगु अवस्थाय् नं लय् चिनामि नकःमिं निरन्तर कथं नेपालभाषाया म्येचा पिथनाच्वंगु छगू गर्वया खँ धयादिसें नेपालभाषाया म्येचा पिथनेगु धइगु जू म्हितेगु थें जूगु व उकी थःम्हेस्यां तंकेगु बाहेक मेगु छुं जुयामच्वंगु खँ धयादिल । थुकिया लागि सकल नेवातय्सं ग्वाहालि यायेमाःगु खँ कनादिल । लय् चिनामि मनराजा नकःमिं नं नुगः खँ प्वंकादीगु उगु ज्याझ्वलय् मंगल महर्जनं लसकुस याःगु खःसा म्येचाः पिथनेत ग्वाहालि यानादीपिं, म्ये हालादीपिं सकलसित मतिनाया चिं कथं सिमाकचा म्येचाः देछाःगु खः । जुजकाजी रंजित, रत्नशोभा महर्जन, मदनकृष्ण श्रेष्ठ, संगीता शाक्य, कविता जोशी श्रेष्ठ, लसता जोशी, सत्यनारायण मानन्धर आदि कलाकारकातय्सं सः बियादीगु दुसा म्येचाकय् मुक्कं १३ पु म्ये दुथ्यानाच्वंगु दु ।

थौं हे नेपालभाषाया म्ये हालामि नापं लय् चिनामि धनबहादुर गोपालीया 'मतिनाया चिखि' सिडि विमोचन जुल । कलानीधि इन्दिरा संगीत महाविद्यालय पूच्वय् जूगु उगु ज्याझ्वलय् मूपाहां जनकवि दुर्गालाल श्रेष्ठं उगु म्येचा:या उलेज्या यानादीगु खः । ज्याझ्वलय् लय् चिनामि दीपक जंगम, अमरराज शर्मा, कलानीधि इन्दिरा संगीत महाविद्यालयया इन्दिरा श्रेष्ठ आदिपिनिगु उपस्थिति दुगु खः । धन बहादुर गोपालीया याकः सलय् पिदंगु थुगु म्येचाकय् जीवनलाल मास्के, हरिशरण साय्मि, मनराजा नकःमि, धनबहादुर गोपाली नापं नांजाःपिं लय् चिनामिपिन्सं लय् तयादीगु दु । थुगु म्येचाकय् मुक्कं गुपू म्ये दुथ्यानाच्वंगु दु ।

अथेहे ज्यापु प्रज्ञा भवन यलय् थौं हे लय् चिनामि नारायण बहादुर महर्जनया 'तिमिलाया जः' म्येचा: वरिष्ठ म्ये हालामि प्रेमध्वज प्रधानया ल्हातिं पितब्वज्या जुल । लय् चिनामि महर्जनया न्हापांगु देछा थुगु म्येचाकय् मुक्कं गुपू म्ये दुथ्यानाच्वंगु दुसा थुकियात कयाः नेपालभाषाया नांजाःम्ह लय् चिनामि अमरराज शर्मा समीक्षा यानादीगु खः । लय् चिनामि नारायण बहादुर मर्हजनया गुरु रामकृष्ण महर्जनया उपस्थिति दुगु उगु ज्याझ्वलय् सनुबाबु महर्जन व रत्नशोभा महर्जनं म्ये हालादीगु खः ।

More Stories Like this