भद्रगोल लँयात व्यवस्थित याये

नेवाःतय्गु मूबस्तिकथं कयातःगु भोताहिति असं त्यःर थाय्मदु जनबाहाः वंगः हलुमान ध्वाखा मरुत्वाः लागाया थासय् लँय् जुइत हे थाकूगु दु । छगूला नखःया निितं धकाः बच्छि लँ त्वपुइक पसः तइगु इलय् - थप मोटर साईकल व मोटर वयाः लँजुवाःतय्त हैरान यानाच्वंगु दु । स्वतन्त्ररुपं वये वने दैगु लँय् घण्टौं लगय् जुइक छम्हय्स्यां मेम्हय्सित घ्वात्तु घ्वानाः लँय् जुइमाःगु दु । नखः जुलकि थ्व सास्ति छाय्
छुं ई न्ह्यः असंनिसें वंगःतक्क पसः पिकाये मदुगु व्यवस्था यायेवं लँय् जुईपंसं सन्तोषं सासः ल्हाय् खंगु खः । तर वंगु मोहनि व आः स्वन्तिया भद्रगोलं हानं लँय् जुईपंसं वहे न्हापाया कष्ट फय्माला च्वंगु दु । नेवाःतय्गु नुगः जुयाच्वंगु मू मू बस्तिइ न्ह्याबलें थथे जुइगु खःला
वंगु छुं ई थुखे असनंनिसें वंगःतक्क अनया लागाया संघ संस्था व क्लब जानाः गुगु व्यवस्था याःगु खः उगु व्यवस्था नखःचखःया इलय् नं जुइमाः थें च्वं । नखः चखः वल धायेगु तुं न्ह्यःने लाःम्ह व्यक्तियात पसः तयेके बीगु खःसा म्होिनं उगु इलाकाय् मोटर साईकल व रिक्सात चलय् याकेगु बन्द यायेमाः । बहनीइ बहनीइ सुरक्षा गार्ड तय्गु व्यवस्था याःथें न्हिनय् न्हिनय् कमसे कम मोटर साईकल व रिक्सा चलय् याकेगु पूर्णत बन्द यायेफुसा लँय् जुईपंसं सास्ति नयेमाली मखु । सम्बन्धित निकाय संघसंस्था व क्लबतय्सं थुखेपाखे ध्यान बीगु तसकं बांलाइ ।
च्वय् न्ह्यथनागु त्वालं मोटर मोटरसाइकल धनीिपंसं नं हुलं जुइगु इलय् थुज्वःगु थासय् मवंसे भचा ताःपाःसां भचा चाःहिलेमाःसां उगु बस्ति दथुं थःपिनिगु सवारी साधन चलय् मयाये । लँय् जुइ हे मिछंथाय् हुलदथुं मोटर साईकल चलय् यायेगु न्ह्याइपुथें च्वंसां थुिकं लँजुवाःतय्त तसकं दुःख जुइ कष्ट जुइ लँय् घण्टौं अवरोध जुइधकाः बिचाः यायेफयेमाः । हुल दथुं मोटर - मोटर साईकल गयाः न्ह्याइपुकेगु मूर्खता खः। सलंसः मनूतय्त मिछंक मोटर साईकल गयाः ईया बचत ला जुइ हे मखु म्वाःसा म्वाःसां लँजुवाःतय्त धक्का नकाः मिछं मिछं चलय् याईपंत ख्वाः न्ह्यःने छुं हे मधाःसां - मनं मनं ला अवस्य सुवाः मखु सराः जक बी । उज्वःगु सराःबीगु ज्या याकेगु धयागु ला निश्चितरुपं बांलाःंगु व बुद्धिमानी खँ मखु ।
स्थानीय निकायत संघसंस्था व क्लबत लगय् जुल धाःसा लँय् बांलाक्क हे व्यवस्था यायेज्यू धकाः ला - असनं निसें वंगःतक्क पसः चीकाः क्यनेधुंकूगु दु । आः मेमेगु त्वाः चुक व अतिकं व्यस्त जुइगु सतकय् स्थानीय निकाय प्रहरीतय्गु ग्वाहालि कयाः नेवाः बस्ति नेवाः लागाय् भद्रगोल मखु बांलाःगु व्यवस्था यानाः झीगु थाय्बाय्यात झीसं हे सुचुपिचु व सुविधायुक्त यायेमाः । लँय् जुयाच्वंगु भद्रगोलयात चीके । स्थानीयस्तरया क्लब व संघसंस्थातय्सं थुखेपाखे ध्यान बियाः थःपिनिगु त्वाःयात व्यवस्थित यायेगु ज्यायात प्राथमिकता बी । नेवाः बस्ति व नेवाः लागायात झः झः धायेके । थःगु त्वाः बस्तियात बांलाके । न्हूगु नेपाः दयेकेगु अभियानय् झीसं नं थःथःगु थासं ग्वाहालि याये ।

More Stories Like this