कांग्रेस सांसदतय्सं हे पौडेलयात मत मबिल
येँ (झीगु स्वनिगः)
प्रधानमन्त्रीया नितिं म्हिगः बुधवाः व्यवस्थापिका संसदय् जूगु झिंखुक्वःगु चुनावय् नेपाली कांग्रेसया याकःचा उम्मेदवार रामचन्द्र पौडेलयात झन झन हे म्हो जक मत वःगु दु ।
नेपाली कांग्रेसया सांसदत हे ११४ म्ह दुगु खःसा कांग्रेसया हे सांसदतय्सं वय्कःयात मत मतःगुलिं झन झन मत म्हो जुयाः वनाच्वंगु खः । म्हिगःया चुनावय् जम्मा ८२ मत जक काल । १०१ सांसदतय्सं ब्वति काःगु उगु चुनावय् २ मत विपक्षय् वंगु खःसा मेगु १७ म्ह सांसदत तटस्थ च्वंगु खः । अथे कांग्रेसया सांसदतय्सं तकं मतदानया प्रकि्रयाय् उपस्थिति मजुयाहःगुलिं मनूतय्सं अर्थपूर्ण रुपं कयाहःगु दु । एकीकृत माओवादी एमाले नेमकिपा नापं बहुमत दल व दुई तिहाईसिबें अप्वः सांसदतय्सं पौडेलं नां लितकयाः सहमतिया आधारय् न्हूगु प्रकि्रयां वनेमाः धकाः माग यानाः वयाच्वंगु खः । थ्व हे झ्वलय् स्वन्ति नखः लिपा कार्तिक २९ गते झिंन्हय्क्वःगु चुनाव याइगु जूगु दु ।
