नर्मदेश्वरजुया च्वसुया भाय्

सम्पादकजु,
च्वमि भाजु नर्मदेश्वर प्रधानया च्वसु 'सन्ध्या टाइम्स'य् वाःवाःपतिकं ब्वने दयाच्वंगु दु । वय्कःया च्वसुइ विषयया विविधता दु । अथे जुयाः थ्व पालय् छु विषयया च्वसु वल थें धकाः स्वयेगु बानि हे जुइ धुंकल । गबलें तसकं च्वन्ह्याःगु च्वसु छपु ब्वनेखन धयाथें मन लय्ताइ । गबलें धाःसा म्वाःमदुगु दुइमरु सुइमरु खँ च्वयातः थें नं तायावइ । न्ह्यागुसां वय्कलं च्वयादिल । यःगुसा ब्वने मयःगु जूसा मब्वने छुं खँ मदु । तर नुगलय् मन्ह्यनाच्वंगु छता खँ दु । वय्कलं दँदँ दयेधुंकल ुसन्ध्या टाइम्सुय् च्वयाच्वनादीगु तर भाषाय् धाःसा सुधार मवः । जिं थ्व हे पत्रिकाय् ब्वनाः सीकातयागु छता खँ छु धाःसा छगू इलय् वय्कः त्रिविविया नेपालभाषा केन्द्रीय विभागया नायः नं खः । तर वय्कःया च्वसु ब्वनेबलय् खय् भाय्या 'लेख' ब्वनाच्वनागु लाकि नेवाः भाय्या 'च्वसु' ब्वनाच्वनागु धकाः तिफ्याये हे थाकु । प्यब्वय् स्वब्वं मल्याक नेपालभाषाया खँ मखुकि खय् भाय्या 'शब्द' दुथ्याकातःगु दइ । वंगु मंगलवाः पिदंगु 'तर जिं मनया…' नांगु च्वसु छक्वः जक ब्वना स्वःसां थ्व खँ यचुक सीदइ ।

उकी च्वयातःगु छुं छुं झ्वः थन न्ह्यब्वये- १) युवा युवती ल्यासे ल्याय्म्ह धाःसा गाःथाय्तय्त मुक्त पे्रम व्रीडाया निंतिं असंख्य कि्रडास्थल.. २) खुलेआम चुम्बन ३) पे्रमय् निषेध सह्य… ४) दु्रतगितं फस्टे जुया वयाच्वंगु अनुभव… ५) उदांग ह्वातां धाःसा गाःथाय् ६) बृद्ध पाचनकृया ७) निर्माण याना बी दयेका बी धाःसा गाःथाय् ८) खुल्ला पे्रमया विकासय् बे्रक लगे… आदि आदि ।

उकिं वय्कः च्वमि भाजुयात च्वसु च्वयेबलय् विषय विविधताय् ध्यान बियादी थें च्वयेगु भाषाय् फयांफछि नेवाः खँग्वः छ्यलेगु खँय् नं ध्यान बियादीत इनाप याना । उलि जुल धाःसा वय्कःया च्वसुइ पक्का नं लुँइ लसां तये थें जुइ । सुभाय् ।

- सूर्यमान महर्जन,
धिमेल्वहं, येँ ।

More Stories Like this