आः एकल संघीय नागरिकता

गैर आवासीय नेपाःमितय्त नं नागरिकता

येँ (सन्ध्या टाइम्स)/संविधान निर्माण यायेगु झ्वलय् जुयाच्वंगु विवाद ज्यंकेगु निंतिं धकाः दयेकूगु उच्चस्तरीय राजनीतिक कार्यदलं आवंलि फुक्क नेपाःमितय्त एकल संघीय नागरिकता बीगु निर्णय याःगु दु ।

थीथी कथंया ब्यागलं ब्यागलं प्रदेशं ब्यागलं कथंया नागरिकता मबीगु अले केन्द्रं बीगु नागरिकताय् हे प्रदेशया नां दुथ्याइगु व्यवस्था यायेगु खँ नं क्वःछिउगु खः ।

थौं सुथय् च्वंगु उगु कार्यदलया मुँज्यां थव खँ क्वःछिउगु खः। उगु इलय् बीगु नागरिकताय् प्रदेशया नां, जातिया नां नं दुथ्याइ। सिंहदरवारया राज्य व्यवस्था समितिया ज्याकुथी मुँज्यां आवंलि गैर आवसीय नेपाःमितय्त नं नागरिकता बीगु खँ क्वःछिउगु दु ।

गैर आवासीय नेपाःमितय्त राजनीतिक अधिकार मदइगु कथंया नागरिकता बीगु निर्णय नं बैठकं याःगु दु। अथे हे मांअबु निम्हं नेपाःमि जूसा जक वंशजया आधारय् नागरिकता बीगु अले मां वा अबु छम्ह जक नेपाःमि जुल धाःसा इमित अंगिकृत नागरिकता बीगु सहमति नं जूगु दु।
थ्यंमथ्यं निघौ तक जूगु उगु मँज्यां नेपाःमि मिजंलिसे इहिपा याःम्ह विदेशी मिसां अंगिकृत नागरिकता काये फइगु ब्यवस्था न्हूगु संविधानय् यायेगु सहमति जूगु दु।
अथे हे मिसा नेपाःमि जुयाः विदेशी मिजंलिसे इहिपा जूगु अवस्थाय् उम्ह मिजं निरन्तर रुपं १५ दँ तक नेपाः च्वन धाःसा उकिया आधारय् वयात अंगिकृत नागरिकता बीगु नं सहमति जूगु दु ।

अंगिकृत नागरिकत राष्ट्रपति, उपराष्ट्रपति, प्रधानमन्त्री, सभामुख, सुरक्षा निकायया प्रमुख, प्रधानन्यायाधीश, प्रदेशया प्रमुख व उप प्रमुख धाःसा जुइ मदइगु ब्यवस्था याःगु दु। थौंया मुँज्यां गुगु कथं नागरिकताया सवालय् विवाद जुयाच्वंगु खँय् आः विवाद मंत धकाः धाःगु दु।
कार्यदलं गुलि नं खँय् सहमति ब्वलंके धुंकूगु दु व खँ प्रस्तावया रुपय् थौं सनिलय् च्वनीगु संविधानसभाया २७ दलया मुँज्याय् न्ह्यब्वइगु जूगु दु ।

उगु मुँज्याय् कार्यदलया म्याद हाकनं थप यायेगु निंतिं प्रस्ताव तयेगु ज्या नं जुइ धाःगु दु। शासकीय स्वरुप नापं मेमेगु विषयय् विवाद ज्यंकेमानिगु जुयाः कार्यदलया म्याद हाकनं थपे यायेगु प्रस्ताव यंकेत्यंगु खँ छम्ह नेतां धयादीगु दु ।

थौं सनिलय् संविधानसभाया भवनय् २७ दलया मुँज्या च्वनेत्यंगु दु ।