भारतं छ्वया हःगु न्हूगु नक्साया विरोध याये

गबलय् नेपालय् राजनीतिक संकट वइ अबलय् अबलय् छुं न छुं फोहोरी कासा म्हिताः लबः कायेगु भारतया पुलांगु हे बानी खः। भारतं वहे बानी कथं थुगुसी नं देशय् न्हूगु संविधान च्वयेगु अलमल जुयाच्वंगु इलय् वयाः निगू देय् दथुया सीमा सम्बन्धी छगू न्हूगु प्रस्ताव न्ह्यःने हःगु समाचार प्रकाशित जूगु दु। नेपाः व भारत दथुइ विवाद जुयाच्वंगु आपालं लागायात थःगु भूभाग दुने लाकाः तयार यानातःगु उगु नक्साय् सही याना बी माल धकाः भारतं नेपाःयात बिया हःगु खँ समाचारय् उल्लेख दु। भारतया थ्व प्रस्तावयात सामान्य रुपं जक कुंखिनाः मगाः। निगू देय् दथुया सीमा समस्या धइगु निपी प्यपी जग्गाया जक खँ मखु। थ्व उमिगु सार्वभौमिकतालिसे समेत स्वाःगु विषय खः। थज्याःगु विषयय् याकःचां निर्णय यायेगु अधिकार गुगुं नं देय्या सरकार वा पार्टीयात दइ मखु। उकिया लागिं राष्ट्रिय सहमति व गहन प्राविधिक अध्ययन जुइमाः। सीमा सम्बन्धी खँ गुलि संवेदनशील जुइ धइगु खँ भारतं मथूगु खइ मखु। थज्याःगु विषय तकं छुं हे छलफल मयासे सुटुक्क सही याकेत छ्वया हयेगु भारतया थ्व ज्यायात गुगुं नं कथं इमान्दार पलाः धाये फइ मखु। थ्व आः जक मखु, न्हापा न्हापा नं भारतं नेपाःलिसे थज्याःगु हे व्यवहार याना वयाच्वंगु दु। सन् १९५० या असमान मैत्री सन्धि, सन् १९६५ या सैन्य सन्धि, सन् १९९१ या सन्धि लगायत गण्डकी, कोशी सन्धि फुक्क हे भारतं थज्याःगु हे जटिल राजनीतिक परिस्थितिया लबः कयाः सम्पन्न यानातःगु खः। थौंया न्हूगु युगय् नं वहे व्यवहार यानाच्वन धइगुया अर्थ नेपाःयात भारतं अझ नं बांलाःगु मिखां मस्वःनि धइगुया हे दसि खः ।

More Stories Like this