भारतं छ्वयाहःगु न्हूगु नक्सा
येँ (सन्ध्या टाइम्स)/गबलय् गबलय् नेपालय् राजनीतिक अस्थिरता ब्वलनी अबलय् अबलय् भारतं छुं कि छुं लबः कायेगु ज्या याये हे धुंकी। थौंकन्हय् नं देशय् राजनीतिक अस्थिरता ब्वलनाच्वंगु इलय् लाकाः भारतं अज्याःगु हे छगू लबः कायेगु कुतः यानाच्वंगु खँ सीदुगु दु ।
छगू विशिष्ट सूत्रं बिउगु जानकारी कथं भारतं थौंकन्हय् नेपाःयात छगू अज्याःगु नक्सा छ्वया हयातःगु दु गुकी नेपाःया आपालं भूभाग भारत दुने लाकातःगु दु। नेपाःया सरकार व राजनीतिक पार्टीतय्सं उकी हस्ताक्षर याना बी माल धकाः थन छ्वया हःगु खँ सूत्रं धाःगु दु ।
भारतं थ्व नक्सा आः छ्वया हःगु मखु। न्हापा नेकां सभापति गिरिजाप्रसाद कोइराला दुबलय् हे उगु नक्साय् सही याना बिउ धइगु प्रस्ताव नेपाःयात छ्वयाहःगु खः। तर गिरिजाप्रसाद कोइरालां भारतया मेमेगु फुक्क खँ न्यंसां नेपाःया भूभाग हे भारतपाखे लाः वनीगु उगु नक्साय् सही यायेत धाःसा तप्यंक हे अस्वीकार याना छ्वःगु खँ सूत्रं धाःगु दु। राजनीतिक पार्टीतय् दथुइ उगु नक्सा उबलय्निसें हे चर्चा व कपाः स्याःगु विषय जुयाच्वंगु खः ।
भारतं न्हापा सरकारयात जक छ्वयाहःगु उगु नक्सा आः फुक्कं तःधंगु राजनीतिक पार्टीतय्थाय् नं थ्यनेधुंकूगु दु। राजनीतिक पार्टीत उकियात स्वीकार यायेत तयार मदुसां नं थुकियात कयाः भारतयात मंकाः कथं लिसः बियाछ्वये माःगु बिचाः जुयाच्वंगु खँ धाःगु दु ।
२०४६ सालया आन्दोलन जुयाच्वंगु इलय् नं भारतं तत्कालिन जुजुयात छगू न्हूगु सन्धिइ हस्ताक्षर याना हजि धकाः सन्धिया मस्यौदा छ्वया हःगु खः ।
