भाषा नीतिया खँय् चिला वंपिं पार्टीत

न्हूगु नेपाःया भाषा नीतियात कयाः हानं विवाद पिहां वःगु दु। संघीय नेपाःया भाषा नीति छु जुइमाः धकाः उच्चस्तरीय राजनीतिक कार्यदल दुने जूगु सहलहं छुं हे लिच्वः पिकाये मफयेवं अन्ततः थ्व ज्या नं भाषा आयोगयात त्वःतेगु धकाः निर्णय जूगु दु। वास्तवय् भाषा नीतिया सवालय् गुगुं हे राजनीतिक पार्टीत अडान कायेत तयार मदु धइगु खँ थुकिं स्पष्ट याःगु दु। थ्व स्वयां न्ह्यः राज्य पुनर्संरचना गय् यानाः यायेगु धइगु खँय् विवाद पिहां वःबलय् छखलकं थ्व ज्या राज्य पुनर्संरचना आयोगयात याके बीगु धकाः सुझाव न्ह्यःने हःगु खः। तर उगु सुझावयात संविधानसभाय् दुथ्याःगु माओवादी लगायतया छुं दलतय्सं विरोध यासें थ्व ज्या आयोगपाखें मखु जनतां निर्वाचित यानाः गठन यानातःगु संविधानसभापाखें यायेमाः धकाः अडान काःगु खः। तर आः भाषा नीति गज्याःगु जुइमाः धइगु खँ भाषा आयोग गठन यानाः जक निर्धारण यायेगु जुइ धकाः प्रस्ताव वःबलय् धाःसा गुगुं हे पार्टीं उकिया विरोध मयाः। देय्या भाषा नीति गज्याःगु जुइमाः धकाः थनया आदिवासी जनजातितय्सं तया वयाच्वंगु सःयात संविधानसभाय् अडानया रुपय् प्रस्तुत यायेत सुं हे राजनीतिक पार्टी तयार मजूगु धाथें नं विडम्बनाया खँ खः। थ्व खँ आयोगया जिम्माय् बियाः थःपिं पन्छे जुइगु ज्या राजनीतिक पार्टीतय्सं याःगु दु। थ्व देशय् जनतां संघीय व्यवस्थाया माग याःगु विभेदकारी भाषा नीतिया कारणं यानाः नं खः। आः भाषा नीतिया खँय् हे पार्टीत स्पष्ट मदुसा थ्व संघीय व्यवस्थां थनया आदिवासी जनतायात धाथें न्याय याइ धकाः गय् यानाः पत्याः यायेगु? छगू आशंका ब्वलंगु दु ।

More Stories Like this