न्हूदँय् एकरुपता हयेगु निंतिं पहल यायेत देय् दबूयात इनाप

न्हूदँ हनेत थीथी थासय् निस्वंगु न्हूदँ ग्वसाः खलया प्रतिनिधितय्सं न्हूदँ हनीगु ज्याय् एकरुपता हयेगु निंतिं नेवाः देय् दबूयात पहल यायेत इनाप याःगु दु ।

नेवाः देय् दबूलीं न्हूदँ हनेगु इलय् एकरुपता हयेगु निंतिं थीथी थासय् दयेकातःगु न्हूदँ हना खल पुचः नाप याःगु अन्तक्रिया ज्याझ्वःलय् थीथी क्षेत्रया प्रतिनिधितय्सं अज्याःगु सुझाव ब्यूगु खः । थीथी थासं ब्वति काःपिं प्रतिनिधितय्सं थःपिनिगु थासय् थःपिसं फु कथं न्हूदँ हनावयाच्वनाःगु तर अन समन्वय यायेगु छुं नं निकाय मदुगु धासें नेवाःतय् राष्ट्रिय संगठन जूगुलिं देय् दबूलिं थुकी पहल यायेमाःगु बिचाः प्वंकूगु खः ।

अथेहे उगु भेलां स्वन्ति नखःलय् एकरुपता हयेत कात्तिक २०, २१ व २२ गते झ्वलिक लक्ष्मीपुजा, म्हपुजा व किजापुजा यायेत इनाप यासें छगू मंकाः विज्ञप्ति पिथनेगु निर्णय नं याःगु दु ।

उगु भेलाय् नेवाः देय्गू नेपालमण्डलया न्हूदँ समारोह समिति, लिधंसा पासा पुचः, न्हू पुचः, ग्वंगःबु न्हूदँ समारोह समिति, टिष्टुङ्ग बज्रवारही नेवाः पुचः, न्हूदँ हना सर्वदलीय समिति चोवाः, नेपाःमि पुचः कोटेश्वर, तिमिला खल लगायत थीथी खल पुचःया प्रतिनिधितय् ब्वति दुगु खः ।

More Stories Like this