लोकतन्त्र मथूपिंसं नागरिकया सः न्यनीला ?

देशय् राजनीतिक गतिरोधं तःधंगु थाय् कयाः छगूकथंया हाना मदयाच्वंगु इलय् नागरिक समाजं म्हिगः नागरिक पदयात्रा याःगु दु । येँया बसन्तपुरं न्हू बानेश्वरस्थित संविधानसभाया भवन तक्क पदयात्रा यानाः देशया जिम्मेवार पार्टी नेता सभासद्पिंत शान्ति संविधान व लोकतन्त्रया नितिं ध्यान सालाकाःगु दु ।

तर दलाल राजनीतियानाः देशयात अनिर्णयया बन्दी यायेत तुतिं निसें बल पिकयाः यथास्थितिइ रमय् जुयाच्वंपिं संसदीय राजनीतिक दलतय्सं नागरिक समाजया थुगु पदयात्रा यात छुं नं कथं सकारात्मक मिखां स्वइ धकाः धायेफैमखु । म्हिगःतक्क प्रजातन्त्रया जपमाः चाःहिका च्वंपिं संसदीय दलतय्त देशय् लोकतान्त्रिक गणतन्त्र वयेधुंकाः लोकतन्त्र छु झंगया नां धकाः न्यनेकने यानाः न्हिइकेगु ज्या यानाच्वंगु दु ।

थ्व छगू विडम्बनाया हे खँ खःकि संसदीय राजनीतिक दलतय्सं थौं संविधानसभायात व्यवस्थापकीय संसद बाहेक मेगुकथं कायेगु स्वयाच्वंगु हे मदु । शान्ति व संविधानया नितिं ज्या छुं मयाः थ्यंक हे मधाःसां संविधान च्वज्या व शान्ति प्रकि्रयायात थासय् थ्यंकेत थुपिं इमान्दारीपूर्वक न्ह्यःने वयाच्वंगु मदु ।

शान्ति प्रक्रिया महत्वपूर्ण पक्षं सेना समायोजनया खँ ल्हाःसां शान्ति प्रक्रियाया मेगु पक्ष न्हूगु संविधान दयेकेगुपाखें संसदवादी दलतय्गु ल्हाः वनाच्वंगु मदु । मुस्किलं छुं हे थपय् जूगु संविधानसभाया म्याद नं बुलुं फुइगुपाखे वनाच्वंगु खः । संविधान सभायात संसदयानाः निर्माणया ज्या खास पलाखं न्ह्याका वयाच्वंगु खः । वंगु स्वदँया दुने प्रगति स्वयाः दुर्गतिया आभाष बियाच्वंगु दु ।
प्र.म. माधव कुमार नेपालया कामचलाउ सरकारं सरकारय् च्वनाः छु यायेज्यू व छु यायेमज्यू धयागु सामान्य जानकारी तकं मदयेधुंकूगु दु । कामचलाउ सरकारं बजेट हयेमज्यू धाःसां जबरजस्ती बजेट हयेत स्वयाच्वंगु दु । थुकिया नितिं खुँ लँ छु छु दइ धकाः मायेकेगु ज्या यानाच्वंगु दु । संविधान संशोधन यानाः बजेट हयेगु विकल्प ब्यूसां सत्ताय् च्वंपिंसं राष्ट्रपति शासन लगय् यानाःसां बजेट हयेगु व थःपिंत माःगु खर्च पिकायेत स्वयाच्वंगु धयागु थुकिं गैर लोकतान्त्रिक चरित्रया लिधँसाय् देशयात रशातलय् यंकेगु खः झ्वाकलय् थुनेगु खः । थुज्वःगु स्थितिइ नागरिक समाजया खँ न्यनी धकाः आश यायेगु तक्कं व्यकार खः । थुमिसं सतकया सः नागरिकया सः ताइ वा न्यनी धकाः धायेत तकं थाकुइ थुंकूगु दु । नागरिक समाजं शान्ति र्याली वा शान्ति पद यात्रा मार्फत दवाब बीगु खः । तर मिखा न्हाय्पं मदुपिं वर्तमान सत्ताधारीतय्त न्ह्यलं चायेकेत अःपुइथें मच्वं । दवाब बीगु धयागु मखंपिंत मथूपिंत वा मस्यूपिंत लँ क्यनेगु खः । तर लाज शर्मयात हे मियाः नयेधुंकूपिंत नागरिक समाजया पदयात्रां गुलित खेँ थ्वइगु खः स्वये ल्यं हे दिन । नागरिक समाजया पदयात्राया दथुं दलाल राजनीतिक पार्टीतय्गु भण्डाफोर जुइ लाकि मजुइ मू खँ थ्वहे खः ।

More Stories Like this