२२ गते बिदा बिइत सरकार बाध्य

येँ (झीगु स्वनिगः)

वर्तमान कामचलाउ सरकार नेवाःतय्सं माग याःगु कथं किजापुजा खुन्हु कार्तिक २२ गते सार्वजनिक बिदा बिइत बाध्य जूगु दु ।

नेवाःतय्गु राष्ट्रिय संगठन नेवाः देय् दबूया पहलय् नेवाः सभासद्पिं नेवाः स्वायत्त राज्य मंकाः संघर्ष समितिइ दुथ्याःगु थीथी घटक थाय् थासय् च्वंगु न्हूदँ समारोह समितिया प्रतिनिधि नेवाः आन्दोलनया न्ह्यलुवाःत म्हिगः मंगलवाः प्रधानमन्त्रीयाथाय् डेलिगेशन वंगु इलय् प्रधानमन्त्री नेपालं बाध्य जुयाः नेवाःतय्गु भावना कथं २२ गते सार्वजनिक बिदा बिइगु जुल धकाः धयादीगु खः ।

नेवाःतय्सं थःगु हे परम्परा कथं स्वन्ति नखः झ्वःलकं हनेमाःगु नापं वइगु कार्तिक २०, २१ व २२ गते हनीगु जूगुलिं २२ गते सार्वजनिक बिदा बियातःगु मदयाः उखुन्हु बिदा बिइमाःगु नापं नेपाल संवत व नेवाः संस्कृति नाप स्वापू दुगु झिगू माग यात कयाः म्हिगः ज्ञापनपौ लःल्हाःगु इलय् अथे प्रधानमन्त्रीं बचं बियादीगु खः ।

येँया नेपालभाषा मंकाः खलः न्हूदँ समारोह समिति ११३१ या नायः विपेन्द्र महर्जन व सदस्य सचिव नरेश वीर शाक्यया नेतृत्वय् कार्तिक ८ गते डेलिगेशन वंगु इलय् 'नेपालय् बिदा अप्वयाः समस्या जुयाच्वंगु दु, २२ गते बिदा बिइगु जूसा १९ गतेया बिदा कटौति यायेमाली' धयादीम्ह प्रधानमन्त्री नेपालं म्हिगः धाःसा नेवाःत फुक्कं छप्पँ जुयावःगु खनाः २२ गते बिदा बिइगु जुल धकाः न्वंवायेत बाध्य जूगु खः ।

म्हिगः लःल्हाःगु ज्ञापन पतिइ नेपाल संवतया न्हूदँ खुन्हु नेपाल संवतया नामं हे बिदा बिइमाःगु, नेपाल संवतयात राष्ट्रिय संवत घोषणा याये धुंकूगु अवस्थाय् आः राज्यं हे न्हूदँ समारोह समिति दयेकाः न्हूदँ हनेमाःगु, न्ह्याबलें नेवाःतय्गु संस्कृतियात ल्वाकःब्वाकः याइगु पात्रो पिथनाच्वंगु पंचाङ समितियात राज्यं बियातःगु मान्यता लित कायेमाःगु नापं थीथी कथंया झिगू सूत्रिय् माग यानातःगु दु ।

नेवाः देय् दबूया नायः नरेश ताम्रकार, नेवाः राष्ट्रिय मुक्ति मोर्चा नेपाःया नायः नापं सभासद् हितमान शाक्य, अथे हे सभासद्पिं डा. मंगलसिद्धि मानन्धर, दिलिप महर्जन, सत्यलाल मूल, बुद्ध साय्मि, नेवाः ख्यःया नापं थीथी खलः पुचःया प्रतिनिधि नापं थाय् थासय् च्वंगु न्हूदँ समारोह समितिया प्रतिनिधिपिं प्रा. माणिकलाल श्रेष्ठ, दिलबहादुर श्रेष्ठ, मल्ल के सुन्दर, डा. महेशमान श्रेष्ठ, डा. चुन्दा बज्राचार्य, प्रा. प्रेम शान्ति तुलाधर, राजेन्द्र श्रेष्ठ, कृष्णगोपाल श्रेष्ठ, वदन शर्मा राजोपाध्याय, मुक्ति प्रधान, सुरेश प्रधान, शान्तप्रकाश श्रेष्ठ, उमेश स्थापित, सुजीब बज्राचार्य, नरेशवीर शाक्य, नरेन्द्रभक्त हाडा, सानुराजा शाक्य, कृष्णलाल गोजा, धर्मशोभा तुलाधर नापं मेमेपिंन्सं ल्हाःचिं तयाः प्रधानमन्त्रीयात ज्ञापन पौ लःल्हाःगु खः ।