संघीय नेपाःया केन्द्रय् आःया नितिं खँय् भाय् व देवनागरिक लिपियात हे नाल
येँ (झीगु स्वनिगः)
न्हूगु संविधान दयेकेगु खँय् दलतय्गु दथुइ विवादित जुयाच्वंगु विषय समाधान यायेत संविधानसभाय् दुथ्याःगु २७ दलया हे सहमति कथं एकीकृत नेकपा माओवादीया नायः पुष्पकमल दाहाल प्रचण्डया नेतृत्वय् थीथी दलया शीर्ष नेतात तयाः नीस्वंगु उच्चस्तरीय राजनीतिक कार्यदलया म्हिगः मंगलवाः च्वंगु मुँज्यां सामाजिक साँस्कृतिक व ऐक्यबद्धताया आधार निर्धारण समितिं तयार याःगु प्रतिवेदनयात लिपांगु रुप ब्यूगु दु ।
सिंहदरवारय् च्वंगु उगु कार्यदलया मुँज्यां भाषा सम्बन्धी थीथी झिगू विवादय् सहमति यासें प्रतिवेदनयात लिपांगु रुप ब्यूगु खः । मुँज्याय् सरकारी कामकाजया भाषा विवाद समाधान यायेत उच्चस्तरीय भाषा आयोग नीस्वनेगु सहमति जूगु दु ।
आयोगया सुझावया आधारय् राष्ट्रिय भाषाया विवाद क्वःछिइगु एमाले नेता भरतमोहन अधिकारीं जानकारी बियादिल ।
संघीय गणतान्त्रिक नेपाःया केन्द्रया नितिं तत्कालयायात धाःसा न्हूगु संविधानय् सरकारी कामकाजया भाषा खँय भाय् व देवनागरिक लिपि हे तयेगु सहमति जूगु वय्कलं जानकारी बियादिल । केन्द्रय् छु छु भाषायात मान्यता बिइगु धैगु खँ भाषा आयोगया सुझावया आधारय् सूचीकृत यानाः जक खँ क्वःछिइगु खँय् नं नेतात सहमति जूगु खः ।
अधिकारीया कथं न्हूगु संघीय गणतान्त्रिक नेपालय् फुक्क हे प्रान्तय् म्होनिं निगू भाषा सरकारी कामकाजया नितिं छ्यलेफइगु जूगु दु । प्रान्त सरकारं मेमेगु भाषायात नं सरकारी कामकाजया भाषा क्वःछिइफइगु वय्कलं धयादिल ।
न्हूगु संविधानय् जनयुद्ध शब्द तयेगु कि मतयेगु धइगु विवाद समाधानया जिम्मा धइगु संवैधानिक समितियात ब्यूगु दु । मुँज्यालिपा कार्यदलया संयोजक लिसे एकीकृत नेकपा माओवादीया नायः पुष्पकमल दाहाल प्रचण्डं सामाजिक साँस्कृतिक व ऐक्यबद्धताया आधार निर्धारण समितिया प्रतिवेदनय् दुगु विवाद समाधान जूगु जानकारी बियादिल ।
उगु कार्यदलया मुँज्याय् कजि प्रचण्ड नापं नेपाली कांग्रेसया नेता रामचन्द्र पौडेल, एमालेया नायः झलनाथ खनाल, नेपाल मजदुर किसान पार्टीया नायः नारायणमान विजुच्छे, कांग्रेसया रमेश लेखक, नेमकिपाया सुनिल प्रजापति, एमालेया भरतमोहन अधिकारी नापं मेमेपिन्सं नं ब्वति कयादीगु खः ।
