भाषाया खँय् आयोग दयेकीगु

आःयात खस भाय् व देवनागरि लिपि

येँ(सन्ध्या टाइम्स)/संघीय गणतान्त्रिक नेपाःया भाषा नीति बहुभाषिक नीति नालेगु धकाः उच्चस्तरीय राजनीतिक कार्यदलं खँ क्वःछिउगु दु ।

फुक्क प्रदेशय् म्होतिं नं निगू भाषायात ज्याखँया भाषाया रुपय् मान्यता बीगु अले केन्द्रय् ग्वःगू भाषायात ज्याखँया भाषाया रुपय् मान्यता बीगु धइगु खँ क्वःछीगु निंतिं भाषा आयोग दयेकेगु अले उकिया आधारय् सूचीकृत यानाः मान्यता बीगु जूगु दु ।

आःयात धाःसा खय् भाय् व देवनागरि लिपियात केन्द्रया भाषाया रुपय् नालेगु लिपा आयोगया सुझाबया आधारय् सुचीकृत यानाः मान्यता बीगु धकाः सहमति जूगु खः।
न्हूगु संविधान दयेकेत विवाद जुयाच्वंगु खँ ज्यंकेत संविधानसभाया २७ दलया हे सहमतिं दयेकूगु उच्चस्तरीय राजनीतिक कार्यदया थौं सुथय् च्वंगु मुँज्यां खँ क्वःछिउगु खः। कार्यदलं सामाजिक, सांस्कृतिक व ऐक्यबद्धताया आधार निर्धारण समितिं तयार याःगु प्रतिवेदनयात अन्तिम रुप बीगु झ्वलय् थज्याःगु निर्णय याःगु खः। मुँज्यां भाषा सम्बन्धी थीथी झिगू विवादय् सहमति यानाः उकथं प्रतिवेदनयात अन्तिम रुप बिउगु खः ।

सिंहदरवारय् थौं सुथय् च्वंगु उगु मुँज्यां सरकारी कामकाजया भाषा विवाद समाधान यायेगु नितिं भाषा आयोग गठन यायेगु अले उगु आयोगया सुझावया आधारय् राष्ट्रिय भाषाया खँ क्वःछीगु धकाः सहमति जूगु खः। धाः कथं प्रान्त प्रान्तया दथुइ अले केन्द्र व प्रान्तया दथुइ सम्पर्क भाषा नं खस नेपाली भाय् हे जुइगु जूगु दु ।

उगु मुँज्या लिपा कार्यदलया कजि नापं एकीकृत माओवादीया अध्यक्ष प्रचण्डं आः संविधानसभाया सांस्कृतिक सामाजिक ऐक्यबद्धताया आधार निर्धारण समितिया प्रतिवेदनय् जुयाच्वंगु विवाद क्वचाल धकाः संचाकरर्मीतय्त धयादीगु दु। थौंया मुँज्याय् प्रचण्ड नापं कांग्रेसया नेता रामचन्द्र पौडेल, एमालेया अध्यक्ष झलनाथ खनाल, नेमकिपाया अध्यक्ष नारायणमान बिजुक्छे नापं मेमेपिंसं नं ब्वति कयादीगु खः ।