खुँ बुद्धि

नर्मदेश्वर प्रधान

खँयाखँय्

क्ल्पिटोमेनिया। थ्व छथी मनोरोग खः। खुइगु। धाइ साधारणतया खुइगु ज्या मदुपिंसं याइ। जीवन गुजारा चले याये फइ मखु। खुइगु बाध्यता जुया बी। तर थ्व ल्वचं ग्रस्त खुँत धनीपिं नं दइ। नये त्वनेगु पूर्तिया लागिं मखु। थुज्वःपिंके खुइगु ज्या ल्वय् जुइ। धनी जुइ। गनं वनी। खुइगु सकसक जुइ। मन ची फइ मखु। खुयां त्वःती। ततःधंगु होटलय् वनाः चम्चा खुया हइपिं धनीपिं दु। सफू पसलय् वनाः सफू सुचुका हइपिं विद्वानत दु। ध्यबा मदयाः मखु। थुज्वःपिनि खुइगु बानी दइ। शौख जुइ। खुइ मजिउ। सियाच्वनी। मन ची फइ मखु। चिचीधंगु वस्तु नं जुक्की। थुज्वःगु बानी मनोरोग जुइ। जटिल जुइ। थुइके अःपुइ मखु ।

थौंकन्हय्। जितः नं थ्व ल्वचं थियाच्वंगु दु। गनं वने। मौकाय् लाके। छुं खुइ। मचाय्कं। मसीक। मखंक कायेगु इच्छा जुयाच्वनी। ताके यानाच्वने। जि उस्त गनं मवना। छथाय् निथाय्गबलें गबलें वने। अन जरुर छुं दइ। अमूल्यगु। ध्याउन्ना जुइ। उखें थुखें मिखा चाःहुइके। छखें अजू चाइ। थ्व खुँ बुद्धि गनं वल दः? थःके छु दु, उकी लुधनाच्वंसा गाःम्ह। छाय् मन ब्वयेकाच्वंगु जिं। छाय् असन्तुष्ट? मेखें तर्क वइ। मौकाय् लाइबलय् कयां तयेमाः। मखुइक अथें सुनां बी मखु। 'हिं' धयां सुनां नां धाइ? उपाय खुइगु हे मखा। स्वथनातःगु दु। खुयां छु जुइ? थःगु ल्हातिइ लाःसाबरु ज्या वइ। ज्या वइ धायेवं कर्कियागुली मिखा तये जी ला? थ्व ला सोह्रै आना खुँ बुद्धि का। सुनां नं हिस्याः थें च्वनी। जितः नं गुबलें गुबलें होश वइ। 'कर्पिनिगुली अथे मिखा गाडे याये मजिउ। थ्व अनैतिक खः। ग्व, शायद जितः नं वहे क्ल्पिटोमेनिया जुल ला? वहे मनोरोगं थिल ला मसिउ। गनं वने। खुइगु हे जक ध्याउन्ना जुइ। खुँयां छु जुइ? मखंक कायेगु ला खः नि। खनी मखु थें। काये। काक्व पाक्व जुइ। जितः खुँ सुनां धाये फइ? गनं वने। भद्र भदलामी हे जुयाः वने। भद्र व्यवहार याये। जितः काचाक्क सुनां खुँ धाये फइ? मिखा छले यानाः खुया हये। दः गनं खुँ धाये फइ? सुनां आँट याये फइ?

खयेफु खुइगु बानी शायद जिके लुयावःगु विकृति। मनोरोग हे खः ला? दुनंनिसें हे खुइ मास्ति वइ दः। उकी हे जिगु ध्यान केन्द्रित जुइ। थ्व हे मौकाया प्रतीक्षाय् सदां जुइ जि। मौका लाइ। खुइ। ताप जुइ। थ्व हे खँय्एकचित्त जुयाच्वनी।
जि व छेँय् निक्वः प्यक्वः वने धुन। वनागु ला खुइत मखु। मेगु हे ज्यां। तर ववं हे जिगु खुइगु प्रवृत्ति च्याना वइ। अन उलि मनूत मदु। च्वनीम्ह छम्ह हे जक। याकःचा। छेँ तखा। झिझांमिझां दं। ववं हे जितः मतिइ वइ। एकान्त वातावरण। छेँथुवाः याकःचा। थन जरुर नं अमूल्यगु वस्तु दइ। झिझां दंगु वातावरण। वातावरणं जिगु खुइगु मनोबल क्वातुकी। जिं बिचाः यायां वने। थन छु छु जक दइगु जुइ। जरुर दयेमाः। झं झं विश्वास क्वातुइ। खुइगु जिगु इच्छा तीब्र जुइ। अनियन्त्रित जुइ। खुइगु ज्या बांमलाः। थ्व झूठ। मौकाय् खुइ हे माः। मौका सितिं छ्वये मजिउ। जि दृढ जुइ ।

व छेँय् वने। थुवाः याकःचा। खँल्हाबल्हा जुइ। जि धाःसा ध्याउन्न हे खुइगु। मौकाय् खुइ हे माः। नुगलं हःपाः बी। घ्वानाच्वनी। जिं खुइत स्वये। ताकतुक खुइ। चीधंगु। तःधंगु धया मच्वना। छु दत। मौका लात। काये। सुचुके। जुक्का हये। छेँथुवालं छुं मतिइ तइ मखु जुइ। जितः वं खुँ गय् धाये फइ? वया न्ह्यःने जि छम्ह भद्र पुरुष। वं सिउ। जिं छुं अभद्र ज्या याइ मखु। वं जि खुँ धकाः गय् शंका याये फइ? असम्भव ।

जिगु खुइगु बानी। रोग बारे छिकपिंत धयाच्वना। 'खुं खुया धाइ मखु' प्रचलित धापू। तर जिं थन मखुगु खँ मल्हाना। खुयागुयात खुयागु धयाच्वना। खँ सुचुका मच्वना। छिकपिंसं थुकियात जिगु कुबानी धयादिसँ। वा अपराध। वा मनोरोग। निर्णय छिकपिनि हे जुइ। खुइगु ज्या जिं याना। आनन्दया निंतिं जक मखु। सन्तोषया खँ नं जुइ। सुचुका तःगु। स्थिर जुयाच्वंगु खुया। निस्त्रिय पूँजी। जिं खुया हये। सक्रिय याये। फुक्कस्यां कल्याणया निंतिं छ्यले। खुइगु ज्या सुतुक्क याःसां सकलया कल्याणया निंतिं यायेगु खः। खुइगु ज्यां जितः अपराधबोध मजू। गन गन वने। अन अन छुं न छुं खुइ। मौका लाःसा त्वःते मखु ।

तर छता खँय् छिकपिं स्पष्ट जुयादिसँ। जिं खुया हयेगु धन वा भौतिक मखु। खल्ती वा झोलाय् तया हयेगु मखु। जिं ल्हातिं खुइगु मयाना। जिं मौका लाकाः खुइगु छेँछेँय् सुचुकातःगु बाखंत खः। उपन्यासत खः। नाटकत खः। जिं सिउ, गुलि छेँय् अमूल्य बाखंत दइ। फ्वसा वयेका तइ। जिं उकुन्हु अन वना। 'छि याकःचा। छिके बाखंया वैभव गाक्कं दु जुइ। गन स्वथना तयादिया। खुया यंकेमाल।' जिं ख्याः याना। बाखंत खुइ दइ ला? कुतः याये। थाय्थासय् वने। जिं मौका लात कि न्ह्यपु जायेक, नुगः जायेक, मिखा जायेक, न्हाय्पं जायेक बाखंत खुया हये। छेँय् हये। खुया हयागु बाखंत सेफय् स्वथनां छु याये? मतिइ वइ। बैंकय् तये दुसा जिउ। बाखंत तरल जुइ। उपयोगी जुइ। गुलिस्यां जीवन सुथां लाइ। जिं थाय्थासं खुया हयागु बाखंत 'सन्ध्या टाइम्स'य् प्वः चिना तइगु दु। स्वये यःसा फ्यनाः स्वयादिसँ ।

More Stories Like this