किजापुया कुन्हु बिदा बीगु

नेवातय्सं कात्तिक २२ गते किजापुजा हनीगु जुइवं प्रधानमन्त्री माधवकुमार नेपालं कात्तिक २२ गते सार्वजनिक विदा बीगु प्रतिवद्धता प्वंकादीगु दु ।

नेवाःतय् राष्ट्रिय संगठन नेवाः देय् दबू लगायत थीथी खल पुचः दुथ्याःगु छगू प्रनिधिमण्डलनाप थौं प्रधानमन्त्री नेपालं थुगु प्रतिबद्धता प्वंकादीगु खः । उगु इलय् वय्कलं दुतिया तिथिया दिं सोमवाः कुन्हु किजापुजा जुइमाःगु जूसां किजापुजा आइतवाः हे तयातःगु प्रति आश्चर्य प्वंकादिल ।

प्रमुख राजनीतिक दलया नेवाः भातृ संगठनत नापं मेमेगू प्रतिनिधिमूलक नेवाः संगठनतय् प्रतिनिधिमण्डलं प्रधानमन्त्री नेपालयात कात्तिक २२ गते किजापुया कुन्हु सार्वजनिक बिदा बीमाःगु, म्हपुजा कुन्हु गोवद्र्ध पुजा धकाः मखसें नेपाल संवत् न्हूदँ सुरु जूगु धकाः बिदा बीमाःगु, नेपाल संवत् बारे अध्ययन यायेत उच्चस्तरी आयोग गठन यायेमाःगु लगायत झिगू बुँदा दुथ्याःगु ज्ञापनपौ लःल्हाःगु खः ।

अथेहे नेवाःतय्गु सांस्कृतिक पर्वय् अनावश्यक हस्तक्षेप यानाः यानाच्वंगु पंञ्चाङ्ग निर्णायक समितियात सरकारं ब्यूगु मान्यता रद्द यायेमाःगु माग नं प्रतिनिधिमण्डल याःगु दु । शास्त्रया पाखण्डीपूर्ण आडय् स्वन्ति हनीगु तिथि विवाद हयाः भ्रम ब्वलंकूगु द्वपं प्रतिनिधिमण्डलं ब्यूगु दु ।

प्रनिधिमण्डलं लःल्हाःगु ज्ञापनपौलय् नेपाल सरकारं पिथनीगु क्यालेण्डरय् नेपाल संवत व दिनाङ्क नं न्ह्यथनेमाःगु, नेपाल संवत् राष्ट्रिय संवत् जूगुलिं थुकीया लसताय् नं नेपाल सरकारं क्यालेण्डर पिथनेमाःगु, नेपाल राष्ट्र बैंकं पिथनीगु दक्वं मुद्राय् नेपाल संवत् न्ह्यथनेमाःगु लगायत माग दुथ्याकातःगु दु ।

More Stories Like this