किजापुजाखुन्हु विदा कायेत थौं प्रमयाथाय् डेलिगेशन

येँ (झीगु स्वनिगः)

नेवाः संस्कृति कथं वइगु कार्तिक २० गते लक्ष्मीपुजा २१ गते न्हूदँ नापं म्हपुजा अले २२ गते किजापुजा यायेगु नितिं समस्या ब्वलनीगु कथं २२ गते सार्वजनिक विदा बियाः मतःगुलिं उखुन्हु सार्वजनिक विदाया माग यानाः नेवाःतय्गु राष्ट्रिय संगठन नेवाः देय् दबूया संयोजनय् थीथी लागाया न्हूदँ हना खलः नापं थीथी खलः पुचःया प्रतिनिधित थौं प्रधानमन्त्रीयाथाय् डेलिगेशन वनीगु जूगु दु । किजापुजा खुन्हु सार्वजनि विदा बिइमाःगु नापं नेपाल संवतयात राष्ट्रिय संवतयात मान्यता बिइ धुंकूगु अवस्थाय् सरकारं नेपाल संवतया न्हूदँयात उत्सवया रुपय् हनेमाःगु म्हपुजा खुन्हु न्हूदँ व म्हपूजा धकाः हे विदा बिइमाःगु नापं थीथी कथंया माग यायेगु नितिं अथे डेलिगेशन वनेत्यंगु खः ।

कन्हय् न्हूदँ हना खलः पुचःया तःजिगु भेला

नेपाल संवतया न्हूदँ ११३१ तःजिक हनेगु नितिं थाय् थासय् नेवाःतय्सं न्हूदँ हना खलः पुचः दयेका ज्याझ्वः यानाच्वंगु दुसा उकियात एकरुपता बिइगु नितिं नापं माःगु कथं सहलह ब्याकेगु नितिं नेवाः देय् दबूया ग्वसालय् कन्हय् दबूया ताम्सीपाखा लागाय् च्वंगु ज्याकुथिइ न्हिनय् १ बजे तःजिक भेला याइगु जूगु दु ।