थौं संविधानया नितिं नागरिक पदयात्रा २६ गते वसन्तपुरय् नागरिक सभाया तयारी

येँ (झीगु स्वनिगः)

शान्ति संविधान व लोकतन्त्रया नितिं नागरिक खलः पुचःतय्सं थौं मंकाः कथं येँया बसन्तपुरंनिसें संविधानसभाया भवन न्हू बानेश्वरय् तक पदयात्रा याइगु जूगु दु ।

याकनं सघन वार्ता या विवादया फुक्क मुद्दाय् सहमति या सहमतिया सरकार गठन या सत्ताया ल्वापु बन्द या फुक्क ध्यान शान्ति प्रक्रिया व संविधानय् केन्द्रीत या न्हापाया फुक्क सहमति सम्झौता अक्षरस पालना याः धैगु नारा थ्वयेक येँया बसन्तपुरय् न्हिनय् २ बजे मुनाः न्यूरोड त्रिपुरेश्वर जुयाः उगु नागरिक पदयात्रा संविधानसभाया भवन दुगुलागाय् वनेगु ज्याझ्वः तयातयागु दु धकाः यल नागरिक अभियानया शाक्य सुरेनं 'झीगु स्वनिगः' यात जानकारी बियादीगु दु ।

नागरिक आन्दोलया थीथी खलः पुचः नेपाल आदिवासी जनजाति महासंघ नेवाः देय् दबू गैर सरकारी संस्था महासंघ प्राध्यपक संघनिसें थीथी कथंया पेशागत व सामाजिक खलः पुचः यानाः झिंखुगुलिं मल्याक संस्थाया मंकाः ग्वसालय् अथे थौं मंकाः पदयात्रा यायेत्यंगु खः । शान्ति संविधान व लोकतन्द्दत्रया नितिं मंकाः नागरिक पदयात्रा धकाः नां तःगु उगु ज्याझ्वलय् थीथी ख्यःया न्ह्यलुवानिसें नागरिक समाजया आन्दोलनय् कि्रयाशिल जुयाः वयाच्वंपिं व्यक्तित्वपिन्सं ब्वति कयादी धकाः नं शाक्य सुरेनं जानकारी बियादीगु दु ।

उगु ज्याझ्वःया नितिं तयारी व सहलह कथं वंगु आइतवाः ललितपुर नागरिक अभियान व कवि क्याफेया मंकाः ग्वसालय् छगू ज्याझ्वः जुल ।

नागरिक आन्दोलनया न्ह्यलुवाः श्याम श्रेष्ठ मूपाहां जुयादीगु उगु ज्याझ्वलय् आःया अवस्थाय् नागरिकतय्गु भूमिका नापं नागरिकतय्सं शान्ति संविधान व लोकतन्त्रया नितिं दबाव बिइमाःगु खँय् सहलह जूगु खः ।

थ्व हे झ्वलय् थौंया उगु पदयात्रा लिपा वइगु स्वन्ति नखःलिपा कार्तिक २६ गते येँया बसन्तपुरय् शान्ति संविधान व लोकतन्त्रया नितिं तःजिक नागरिक सभा यायेगु नं घोषणा याइ ।