उत्कृष्ट मध्येया छगू नेपाः पेभिलियन (भिडियो ब्लग)

हिलंयंकया २४६ देय् व अन्तराष्ट्रिय संघ संस्थातय्सं ब्वति काःगु वर्ल्ड एक्स्पो २०१० म्हिग छगू तःजिगु ज्याझ्वः दथुइ सांघाईलय् क्वचाल ।

खुला तक न्हिया न्हिथं न्ह्याःगु एक्स्पोलं विश्वयात हे छाथय् मुंकूगु खः । छगू पेभिलियनं मेगू पेभिलियनय् दुहांवनीगु इलय् छगू देशं मेगू देशय् वनागु आभाष जुइगु कथं थीथी देय्या पेभिलियन देय्कातःगु खः ।

थंज्याःगु हे थीथी देय्या पेभिलयनया झ्वःलय् दुगु छगू खः झीगु देय्या पेभिलियन - नेपाल मण्डला । 'मञ्जुपतन', 'शान्तिमण्डप', 'अरनिको पेभिलियन' लगायत थीथी नां छुयाः तःगु नेपाः पेभिलियन थुगुसी सांघाईलय् दयेकूगु थीथी देय्या पेभिलियन मध्ये छगू उत्कृष्ट पेभिलियन कथं काःगु दु ।

'बांलाःगु जीवन, बांलाःगु शहर' नारा बियातःगु एक्स्पोलय् अधिकांश विकसित देय्तय्सं आधुनिक विद्युतिय माध्यम छ्यलाः थःगु देय्या प्रस्तुति याःगु खनेदत । तर नेपालं अज्याःगु विद्युतिय माध्यम वयेस्वयां द्वलंद्वः न्ह्यः हे झीगु देय् थःगु लगनशीलता व परिश्रमया हुनिं सांस्कृति सम्पदा व कालात्मकतय् न्ह्यने लाःगु कथं थःगु म्हसिका ब्यूगु खः ।

थ्व कारणं नं नेपाः पेभिलियनया विशेषता अझ अप्वःगु जुइमाः । नेपाःया पेभिलियन दुहांवनेवं तयेदइगु धइगु मनयात आनन्द यानाबीगु नेपाःया मौलिक संगीतया वातावरण । वहे मनयात आनन्द याइगु संगीत नापं नुगःयात थीगु उत्कृष्ट कलात्मक वस्तु ।

आः तक नेपालं ब्वति काःगु एक्स्पोलय् दकलय् अप्व मनूतय्सं अवलोकन याःगु ल्याः ३५ लख जुसां थुगुसी थुगु ल्याः दोबर स्वयां अप्वः जूगु दु । थुगुसी नेपाः पेभिलियन स्वःपिनि ल्याः ७५ लख स्वयां अप्वः जूगु दु ।

नेपालं थःगु मौलिकतायात नालाकाःया प्रस्तुत याःगुलिं हे जुइमाः विश्व समुदाय छगू थासय् दनाच्वंगु इलय् नं नेपालं थःगु बिस्कं हे पहिचान त्वतेफुगु ।

थंज्याःगु बिस्कं हे छाप त्वतेफुगु नेपाः पेभिलियनय् धाथें छु दुगु खः, थुकीया बारे पेभिलियन निर्माण व संचालनया जिम्मा काःगु इम्प्लिमेन्टिङ ग्रुपया नायः अमृतरत्न शाक्यं थुकथं ध्वाथुकादी : (स्वयादिसं भिडिया ब्लग)



७५लख स्वयां अप्व मनूतय्सं स्वःगु नेपाः पेभिलियन यदि छिकपिंसं मस्वयानीगु खःसा थुगु भिडियो ब्लग स्वया अनान्द कयादिसं ।

More Stories Like this