राकेश सूदयात मयल माओवादी व 'र'या स्वापू
येँ (सन्ध्या टाइम्स)/एनेकपा (माओवादी) व भारत दथुया स्वापू थौंकन्हय् स्यना वनाच्वंगुया मू कारण भारतया गुप्तचर संस्था 'र' व नेपाः स्थित भारतीय राजदूतावासया लाइन पाःगुलिं नं खः ।
विज्ञ सूत्रं बिउगु जानकारी कथं थौंकन्हय् नेपाःस्थित भारतीय दूतावास व गुप्तचर संस्था 'र'या बांलाःगु स्वापू मदुगु कारणं यानाः माओवादी व भारतया स्वापू ताःलाये मफयाच्वंगु खः ।
माओवादीं न्हापांनिसें हे भारतलिसे छुं नं कथंया संवाद यायेमाल धाःसा दूतावास सिबें नं 'र'या च्यानल छ्यलेगु याना वयाच्वंगु खः। माओवादी न्हापा भूमिगत जुयाच्वंगु इलय् दूतावासलिसे स्वापू तये मजिउगु कारणं 'र'या च्यानल छ्यलेगु यानाच्वंगु खः। 'र'लिसे माओवादीया थ्व च्यानल अझ नं कायम हे दनि ।
तर माओवादीं खुल्ला राजनीति शुरु यायेधुंकाः नं दूतावास मार्फत ज्याखँ यायेगु पलेसा 'र' पाखें ज्याखँ यानाच्वंगुलिं उकियात दूतावासं धाःसा मयेकाच्वंगु जुयाच्वन। वर्तमान राजदूत राकेश सूदं ला झन व्यक्तिगत रुपं हे थज्याःगु ज्यायात ययेकाच्वंगु मदु। थुकिं यानाः 'र'लिसे जुयाच्वंगु माओवादीया संवाद सकारात्मक जूसां दूतावासपाखें धाःसा छुं हे कथंया सकारात्मक रिपोर्टिंग मवंगु कारणं भारतलिसेया माओवादी स्वापू बांलाये मफयाच्वंगु खँ सूत्रं धाःगु दु ।
'र'लिसे स्वापू तयाः ज्या यायेबलय् उकिया पहुँच तप्यंक हे
भारतीय प्रधानमन्त्रीयाथाय् थ्यनीगु जुयाच्वन।राजदूतावासपाखें ज्या यायेबलय् धाःसा व खँ भारतया परराष्ट्र मन्त्रालय दुने हे चाःचाःहिला च्वनीगु जुयाच्वन। उकिं 'र'लिसे ज्या यायेबलय् याकनं व चुस्त जुइगु जुयाः माओवादीं अप्वः उकी हे बः बियाच्वंगु दावी सूत्रया दु । राकेश सूद नं छम्ह कर्मचारी हे जूगु नातां वय्कःयात माओवादीतय्सं लाकामं कयेकूगु घटनायात भारतया राजनीतिक तहलं खास हे चिउताः तःगु मदुसां अनया परराष्ट्र मन्त्रालयय् ज्या याइपिं कर्मचारीतय्सं धाःसा गम्भीर रुपं काःगु खँ नं धाःगु दु ।
सूत्रया कथं माओवादीं 'र' मार्फत न्ह्याकाच्वंगु भारतलिसेया संवाद धाःसा आः सकारात्मक जुजुं वयाच्वंगु दु ।
