नेवाःतय् राज्यय् मेगु हस्तक्षेप

स्वनिगःया नेवाःतय्त स्वनिगः दुने हे तयाः गः कीगु छगू न्हूगु 'स्कीम' वर्तमान लोकतान्त्रिक गणतान्त्रिक
सरकारं हःगु दु । स्वनिगःया स्वंगुलिं शहरयात छगू हे शहर दयेकाः विकास यायेगु धइगु लक्ष्य तयाः सरकारं छगू विधेयक पारित यायेत्यंगु दु । संसदय् उकियात दर्ता नं यायेधुंकूगु दुसा आः छलफलय् हयेगु तयारी जुयाच्वंगु दु । नेवाः बुद्धिजीवीतय्सं उकियात आः हे विरोध नं यायेधुंकूगु दु ।

देशय् संघीय सरकार मदुनिसां संघीय व्यवस्था लागू हे जुइधुंकल धाःसां जिउ । संघीय प्रणालीया आत्मा हे खः सम्बद्ध प्रदेशया सम्पूर्ण अधिकार वहे प्रदेशया जनतायात बीगु । स्वनिगःया स्वंगुलिं शहर नेवाः प्रदेश दुने लाइ । उकिं स्वनिगःयात गय् यानाः विकास यायेगु धकाः निर्णय यायेगु अधिकार स्वतः थनया नेवाः जनतायात वइ । तर सरकारं नेवाःतय्के छसः तक हे मन्यँसे नेवाःतय् लागायात छगू हे शहर दयेकेगु धकाः कानून हयेगु तयारी यानाच्वन । थ्व ला तप्यंक हे संघीय प्रणालीया खिलाफ खः। वास्तवय् सरकारया थ्व पलाखं थ्व सरकार व मेमेगु नं राजनीतिक पार्टीत धाथें संघीय प्रणालीइ वनेत तयार जुयाच्वंगु जकं खः लाकि मखु धकाः शंका यायेमाःगु अवस्था पिकया बिउगु दु । सरकारया थ्व पलाःयात नेवाः प्रदेशया सरोकारवाला नेवाःतय्सं विरोध याइगु ला द हे दु उकिया नापनापं संघीय प्रणालीया हिमायती धाईपं प्रत्येक राजनीतिक पार्टी नेता व बुद्धिजीवीतय्सं नं विरोध मयासें मगाः । संघीयताया आत्मायात हे स्यानाः संघीय प्रणालीइ वनेगु खःसा गुगु समस्या मदयेकेगु लागिं धकाः राज्यं संघीयतायात नालेत्यंगु खः व अपूर्ण हे जुया बी ।

More Stories Like this