भिंतुना कालबिल ज्याझ्वः
येँ (सन्ध्या टाइम्स) /दी शाक्य फाउण्डेशन नेपालया ग्वसालय् थ्वहे वइगु नेपाल संवत् ११३१ न्हूदँया लसताय् भिंतुना कालबिल ज्याझ्वः न्यायेकल ।
"दी शाक्य फाउण्डेशन नेपाल" या नायः देवकाजी शाक्यया सभापतित्वय् ह्याःगु उगु ज्याझ्वलय् न्हूदँ समारोह समिति ११३१ या नायः विपिन्द्र महर्जनं बोधी मत च्याकाः ज्याझ्वःया उलेज्या यानादीगु दु ।
न्हूदँया भिंतुना कालबिल याइगु उगु ज्याझ्वलय् न्ववासें न्हूदँ समारोह समितिया नायः विपीन्द्र महर्जनं पंचाङ्ग कमिटीं पिकाःगु पात्रोयात हाकुतिनाः झी सकल नेवाःतय्सं थःगु हे पहलं थःगु कार्तिक २०, २१ व २२ गतेकुन्हु छसिकथं लक्ष्मी पुजा, म्हपुजा व किजापुजा न्यायेकेमाःगु खँ कनादिल। वय्कलं ज्याझ्वलय् झीसं थःगु हे तिथिमिति नालेमाः धकाः आह्वान नं यानादीगु खः ।
उगु हे ज्याझ्वलय् 'नेपाल अर्बुद रोग' संस्थाया डा. प्रदीप वैद्यं क्यान्सर (अर्बुद रोग) सम्बन्धी स्लाईड क्यनाः उगु ल्वय्या बारे जानकारी बीगु लिसें उगु ल्वचं मकयेकेत झीसं छु छु यायेमाः धयागु बारे कनादीगु खः। ज्याझ्वःया सभापति भाजुं झी नेवाःत फुक्क छधी छपाँय् जुयाः थःगु संस्कृतिया जगेर्ना यायेमाःगु खँ कनादिल ।
