गज्याःगु जुइमाः संघीय नेपाःया न्याय प्रणाली?

संघीय नेपाःया न्याय प्रणाली गज्याःगु जुइमाः व अन नियुक्त जुइपिं न्यायाधीशपिं गनं गय् यानाः नियुक्त जुइ धइगु खँयात कयाः थौंकन्हय् उच्चस्तरीय राजनीतिक संयन्त्र दुने सहलह ब्यानाच्वंगु दु। थुकियात लसकुस यायेमाः। संघीय व्यवस्था गुलि क्वातुइ, प्रान्ततय्त गुलि अधिकार दइ धकाः निर्धारण यायेगु छगू मापदण्ड प्रान्ततय्सं अभ्यास याये फइगु न्यायिक प्रणाली नं खः । नेपाःया वर्तमान न्याय प्रणाली गुगुं नं कथं वैज्ञानिक मजू। थन सर्वसाधारण जनतां न्याय प्राप्त याये खनीगु ला द हे दु, प्राप्त याइपिंसं तं उकियात उपभोग याये खनी मखु। उकिसनं भ्रष्टाचारं यानाः देय्या न्यायालय प्रति जनताया विश्वास बुलुहुँ र्‍हास जुजुं वनाच्वंगु दु। यदि संघीय व्यवस्थाय् नं थज्याःगु हे न्यायालय ज्वनाः प्रवेश यायेगु खःसा उकिं संघीय प्रणालीयात कमजोर याना बी। थौंकन्हय्या गुगु न्यायिक प्रणाली झीथाय् दुगु खः उकियात नं पुनर्संरचना यायेमाःगु अतिकं आवश्यक दु। माल धाःसा न्यायालयय् च्वनीपिं न्यायाधीशत नं कठघराय् दनेमालीगु प्रणाली झीसं हयेमाः। उकियात फयांफछि जनउत्तरदायी दयेकेगु कुतः नं जुइमाः। अय् जुयाः हे न्यायालययात जननिर्वाचित निकायलिसे स्वायेमाःगु खँ न्ह्यःने वयाच्वंगु जुइफु। तर न्यायालययात मेगु गुगुं निकायलिसे स्वानाः तयेबलय् न्यायाधीशत उगु निकायया सम्मान यायेगु सिबें चाकडी यायेगुपाखे लगे मजुइमा, थुखेपाखे नं ध्यान बीमाःगु जरुरी दु। नेपाःया राजनीति व राजनीतिक नेतात अझ नं शुद्ध मजूगु कारणं यानाः कन्हय् वनाः थज्याःगु समस्या ब्वलनीगु नं उतिकं सम्भावना दु। न्याय प्रणाली निर्धारण यायेबलय् थुकी नं ध्यान बीमाः ।

More Stories Like this