बाखं थःथःगु

मनूया जीवनय् छगू निगू अज्याःगु घटना नं जुया बी यः गुकिं उमिगु मुक्कं जीवनयात हे मेगु मोड बिया बी। भाजु योहानया जीवनय् नं अज्याःगु घटनात जूगु दु। वय्कःया कलाः पोलियोपाखें पक्षाघात जुयाः झिंन्यादँ तक ह्विल चियरय् च्वनाः म्वाये माल। अन्ततः मात्र ४० दँया उमेरय् कलाः मंत। थुकिं यानाः हे वय्कः थः कलाः थें अशक्त जूपिंत ह्विल चियर लःल्हायेत न्ह्यचिलादीगु खः ।

उकिया लागिं वय्कलं नेपाः हे छाय् ल्ययादिल? उकिया लिउने हानं अज्याःगु हे छगू दुःखद घटना दु। छक्वः वय्कः थः पासापिं लिसे नेपाः चाःहिलेगु झ्वलय् अन्नपूर्ण टेकिङ्ग वंगु जुयाच्वन। दुर्भाग्यवश वहे इलय् अन च्वापुया चलः वनाः वय्कः नाप वंपिं फुक्क हे पासापिं सित। वय्कः हे छम्ह जक बचे जुल। वय्कः वहे मदुपिं पासापिंत लुमंकेगु लागिं नं दँय् छक्वः नेपाः झाइगु जुयाच्वन। नेपाःया थ्व लुमंति व थनया प्राकृतिक सुन्दरतां वय्कःयात थ्व देशं मोहित याना तःगु खँ वय्कलं कनेगु यानादी ।

उखे थुगुसी ह्विल चियर प्राप्त यानादीम्ह भाजु अजय स्थापितयात नं थःगु हे दुःखद् बाखं दु। छुं दँ न्ह्यःया खँ खः, येँया जनबाहाः त्वालय् वय्कःया हे छेँ जःखः छम्ह पाकेटमारं सुयां दां लुटे याःगु जुयाच्वन। वय्कलं ज्वनादिल। पाकेटमारयात प्रहरीइ कुने नं यन। खुला ति लिपा पाकेटमार छुटे जुयाः पिहां वल। पाकेटमारं वय्कः प्रति ईख तयातःगु जुयाच्वन। छन्हु मौकाय् लाकाः पाकेटमारं वय्कःयात छुरां सुया बिल। छुरां वय्कःया जँय् घाः लाकूगु जुयाच्वन। तर व घाः सामान्य मजुसे दुगःक्वँचय् च्वंगु तिस्यः हे स्यंका बिउगु लानाच्वन। अब्सांनिसें वय्कःया जँया क्वय्या ब्व मसन। वय्कलं अपांग जीवन हने माल। छगू बांलाःगु ज्या याःगुया लिच्वः वय्कलं फयेमाःगु जुयाच्वन। थ्व ह्विल चियरं वय्कःयात भचा सहज याना बीगु आशा दु ।

More Stories Like this