निलिमाया आत्महत्या

नीरमति वज्राचार्य

जिमि पासा निलिमाया स्कूलं पिकनिक वने धाल। दँय् छक्वः पिकनिक वनीगु। नकतिनि स्कूलय् ब्वंकेत वःम्ह निलिमा पिकनिक वनेगु धाःबलय् वयात तसकं न्ह्याइपु ताल। नकतिनि ब्याहा जूम्ह निलिमा, व नं डाक्टरया कलाः। पिकनिकया लागि पासापिंनाप छु वसः पुनेगु, पर्सि जक सिनेगु ला, कुर्ता हे पुनेगु ला धकाः सल्लाह कया जुयाच्वन। पिकनिक वनेत वया न्हूगु बाःलाःगु पर्सि छत्वाः न्याना नं हल ।

शनिवाः सकलें पिकनिक वन। तर निलिमा मवः। अपाय्सकं पिकनिक वयेत चंचं धायाच्वंम्ह निलिमा पिकनिक मवः। सकस्यां थवंथवं खँ जुल। निलिमा म्हं मफयाः जकं मवल ला? न त छ्वया जकं महल ला। जिं बिचाः याना, मिसातय् वहे खः। बिया छ्वये धुनेव गनं वनेत थाकु। जि नं ला काचाकाचां जा थुयाः जा नकाः वयाम्ह खः नि ।

कन्हय् कुन्हु स्कूल वनाबलय् निलिमां आत्महत्या यात हं धकाः पिउनं धाल। अहो ! अपाय्सकं लय्तायाच्वंम्ह निलिमां आत्महत्या यायेमाःगुया कारण छु थें? धाधामधां निलिमाया न्ह्यःनेसं च्वंम्ह मिस नं थ्यंकः वल। वं निलिमाया बारे खँ मिखाय् ख्वबि जायेक तयाः धाल। निलिमां पिकनिक वये मखनाः आत्महत्या यात। माजुम्हेस्यां मस्यौरा छकः दयेकाः जक हुँ, मस्यौरा मदयेकुसे वने दइ मखु पिकनिक धकाः जोड यानाः धाल थें। भौम्ह नं छुं धाये मफुम्ह जुल। बिचरा निलिमां माजुया थ्व खँ न्यनाः तंया झोंकय् छेँय् दुगु फुक्क वासः नयाः आत्महत्या याना बिल। डाक्टरया छेँय् अनेक वासः दुगु थें। विचरा अकालं हे निलिमा मंत ।

थ्व खँ न्यँसांनिसें जिगु मन साप ख्वल। अनेतनेया खँ दासि वल। छाय् थें मिसातय्त थुकथं बन्धन? मिसात धयापिं छेँया ज्या जक हे यायेगु ला? इमित स्वतन्त्रता म्वाःला? जा थु, जा नकि, वसः हिउ, मचा खाचा स्व, स्कूल छ्व। केवल मिसात च्यः भ्वातिं जक ला? थौंया नीछगूगु शताब्दीइ थ्यनेधुंकाः नं मिसातसें अझ नं स्वतन्त्रता काये मखंनि। नारी स्वतन्त्रताया नारा थ्वयाच्वंगु दु। मिसातय्सं मिसातय्त हे छाय् दमन? भौमचा धइपिं नं सुयां म्ह्याय्मचा ला खःनि। सुयां च्यःभ्वातिं ला मखु। इमि नं इच्छा आकांक्षा दु नि। न्ह्याक्व हे सः सिउसां मिसातय्त छाय् पक्षपात यायेमाःगु थें? बिचरा निलिमा विवश जुयाः सीमाल ।

आः हे नं हरेक मिसातय्सं थ्व दुःख भुक्तमान यानाच्वंगु दु। गनं वने माःसा मिसातय्सं परिवारयात नकेत्वंके याना वनेमाःगु। जागिरय् वनेमाःसा छेँज्या सिधयेकाः जक वनेमाःगु। आखः ब्वनेमाःसा फुक्क ज्या सिधयेकाः मौकाय् लाकाः जक ब्वनेमाःगु। थुकथं छाय् थें मिसातय्त जक धेकाबाजी यानातःगु? मिसातय्त थुकथं छाय् हेला? थौं झीगु समाजय् यायेमाःगु छगू विद्रोह थ्व नं खः। मिजतय् थें मिसातसें नं अवसर काये माःगु दु। थःगु आत्मनिर्णय यायेगु अधिकार थम्हं हे काये माःगु दु। वं मिजं व माजु बाःजु धकाः गंका च्वंतले छुं याये फइ मखु ।

उकिं हानं हानं निलिमा थें सुनानं आत्महत्या मयायेमा धकाः थौंया समाजय् न्हूगु सोच हयेमाःगु दु। केवल नाराबाजीं जक मिस्तय्सं स्वतन्त्रता बिलकुल काये फइ मखु। इमिसं संघर्ष हे याये माःगु दु ।

More Stories Like this