भारतीय दवाव 'अभूतपूर्व'

चीनया रुची खनाः भारत सशंकित

प्रधान सेनापति रुक्मांगद कटवाल छम्हेसित चीकेगु लागिं पिहां वःगु बबालया झ्वलय् थुगुसी भारतं नेपाःयात आः तक गबलें मबिउनि कथंया दवाव व 'ख्याच्वः' बिउगु खँ सीदुगु दु । न्हापा जूसा भारतं 'निर्णय यायेगु अधिकार नेपाली जनताया हे खः' धइगु खँपु स्वानाः जक थःगु बिचाः तइगु खः । तर थुगुसी अथे छुं हे मधासे प्रधान सेनापतियात चीके हे दइ मखु धकाः तप्यंक हे 'आदेश' बियाहःगु खः । उकिं प्रधानसेनापतिया मामिलाय् थुगुसी भारतं बिउगु दवाव 'अभूतपूर्व' जूगु बिचाः कुटनीतिक ख्यलं प्वंकूगु दु ।

थ्व प्रकरणया लबः वा द्यापं छु खः धइगु खँ आः तक प्रस्ट मजूनिसां थुकिं नेपालय् भारतीय दवाव धाःसा न्हापा स्वयां खुल्ला व व्यापक रुपं तयेगु अवसर प्रदान याःगु खँ नं विज्ञतय्सं धाःगु दु ।

आखिर भारतं सेनाया मामिलाय् छाय् थपाय्सकं कडा अडान काल ले थुकिया लिसलय् नेपाः बारे जानकारी दुम्ह भारतया पुलांम्ह सैनिक जनरल भाजु अशोक मेहतां धयादी 'नेपाःया प्रधानसेनापति रुक्मांगद कटवालयात उकुन्हु तिनि भारतीय राष्ट्रपितं भारतीय सेनाया सम्मानार्थ सेनापतिया दर्जा बिउगु खः अथे हे नेपालय् नं भारतीय सेनापतियात सम्मानार्थ सेनापतिया दर्जा बियातःगु दु । सन् १९७० निसें थज्याःगु चलन शुरु जूगु खः । तर सरकारं थज्याःगु परम्परायात छुं हे वास्ता मयात ।'

अथे हे नेपाःया राजनीतिइ थौंकन्हय् अप्वयाच्वंगु चीनया रुचीं नं थुकी भूमिका म्हितूगु वय्कःया दावी दु । प्रधानसेनापति प्रकरणय् उकुन्हु तिनि चीनं बिउगु प्रतिकि्रयायात विश्लेषण यासें वय्कलं धयादी 'उकी निता खँ धयातःगु दु । छता थ्व नेपाःया आन्तरिक मामिला खः । मेता जनमुक्ति सेनायात नं राष्ट्रिय सेनाय् समायोजन यायेमाः । चीनया थ्व धापुतिं नं माओवादीयात सेनाया सवालय् कडा अडान कायेत बः बियाच्वंगु दु गुगु न्हापा गबलें जूगु मदुनि ।'

चीनपाखें नेपाःया मामिलाय् थज्याःगु बिचाः तया हःगु धइगु भारतया लागिं ग्याःचिकुया विषय जुइगु आशय नं वय्कलं प्वंकादीगु दु ।

प्रधानसेनापति प्रकरणय् भारतं चिनिया रुचीयात कयाः असन्तुष्टी प्वंकाच्वंगु इलय् लाक्क प्रधानमन्त्री पुष्पकमल दाहाल 'प्रचण्डं' वैशाख १९ गते निसें यायेगु धकाः क्वःछिना तःगु चीन भ्रमण स्थगित याःगु दु । प्रधानसेनापति प्रकरण देशय् च्वनाः हे ज्यंकेमाःगु जुयाः थःगु चीन भ्रमण आःयात स्थगित यानागु खँ वय्कलं धयादीगु दु ।

लुमंकेबहः जू प्रमया चीन भ्रमण बारे नं भारतं उकुन्हुं निसें चिउताः प्वंका वयाच्वंगु खः ।