पाचाङ्ग समितिया ब्राम्हणवादि नीति

सरकारी स्तरं दयेकातःगु नेपाल पाचाङ्ग समितिं हानं छगू वक्तव्य पिकयाः पूर्वघोषित स्वन्तिया न्हि दोहरे याःगु दु । न्हापा नं थुकथं हे अलमलय् यायेगु पात्र पिकयाः नेवाःतय्गु नखः स्यंकेगु यानावयाच्वंगु व थुकियात कयाः नेवाःतय्सं विरोध यायेवं छुं न्हिं न्ह्यः जक उगु समितिं थःपिनिगु पात्रय् न्ह्यथनातयागु न्हि संशोधन यायेगु बचं ब्यूगुया पाय्छि अःखः वंगु १२ गते मेगु वक्तव्य पिकयाः नेवाःतय्त अलमलय् याःगु प्रष्ट सीदत । मखुसा समितिया पदाधिकारीपिंसं नेवाःतय्गु नितिं छगू ब्यागलं हे पात्रया व्यवस्था याये धकाः बचं ब्यूगुया कन्हय् खुन्हु हे हानं थःपिनिगु हे पुलांगु खँयात अर्थात १९, २० व २१ गते हे लक्ष्मी पुजा, म्हपुजा व किजापुजा धकाः छाय् वक्तव्य पितबिल थुकिया स्पष्ट कारण धयागु उगु समितिया वेदनियति हे खः नेवाःतय्त अलमलय् यायेगु इमिगु नखः गोलमाल यानाबीगु व सुइतं छन्हु सुइतं मेगु खुन्हु नखः हंके बीगु धयागु हे नेपाल पाचाङ्ग समितिया ब्राम्हणवादी सोच खः ।

अथेला नेवाःतय्गु नखःयात वंगु दँबदँ स्यंका वयाच्वंगु नेपाल पाचाङ्ग समितिया नियतयात नेवाः समाजं थुइकाः वयाच्वंगु दु । नेवाः संघ संस्थातय्के दयेधुंकूगु अवस्थाय् आः नेपाल पाचाङ्ग समितिया नियतप्रति नेवाःत न्हापा स्वयाः यक्कों सचेत जुइधुंकूगु दु सजग जुइधुंकूगु दु । तर नं नेवाः संघ संस्थातय्सं उलि ब्यापकता काये मफयाच्वंगु इलय् नेपाल पाचाङ्ग समितिया खँ वा वं पिकया वःगु पात्रतय्गु पाखें निश्चितरुपं अलमलय् याइ मयाइ हे मखु । नेपाली तय्गु छेँय् छेँय् खायातःगु पात्रं ला परिमार्जन जूगु खँयात सर्वसाधारण नेपाःमि जनताया दथुइ थ्यंके फइमखु । आः स्पष्ट हे छु सीदै धाःसा नेपाःमि जनतां छगू हे नखः न्हि पाक्क हनेगु याइ । बौद्ध नेवाःतय्सं २०, २१ व २२ गते छसिकथं लक्ष्मीपुजा, म्हपुजा व किजापुजा याइसा हिन्दुमार्गीतय्सं वा खँय् ब्रम्हूतय्सं थुया पाय्छि छन्हु न्ह्यः १९, २० व २१ गते लक्ष्मीपुजा म्हपुजा व किजापुजा याइ । छगू हे थासय् छगू हे त्वालय् थुगु कथं छगू नखः न्हि पाक्को हनेगु याइ । थ्व विडम्बनाया खँ नेपाःमि जनतां स्वयेत बाध्य जुइ ।

२२ गते सोमवाः किजापुजा खुन्हु सरकारं विदा बियातःगु मदु । नेवाःतय्गु नखःकथं २२ गते सोमवाः किजापुजायात नं विदा बीगु ज्या सरकारं यायेमाः । थुकिया नितिं कामचलाउ सरकारया प्रधानमन्त्री माधव कुमार नेपालयात नेवाःतय्सं नापलानाः थःपिनिगु माग नं न्ह्यब्वये धुंकूगु दु । तर सरकारं थौं तक्क नं उकिया लिसः ब्यूगु मदुनि। वंगु दँय् नं थुगु हे परिस्थितिइ मन्त्री परिषद्ं निर्णय यानाः नेवाःतय्त माःगु विदा ब्यूगु खः । थुगुसी नं थथेहे याइगु अनुमान दु ।

दकले लिपा नेपाल पाचाङ्ग समितिं औंशी खुन्हु म्हपुजा यायेगु धकाः धयावयाच्वंगुया ल्यूने छु गुगु बदमासी सुलाच्वंगु दु धयागु खँय् खोधसोध जुइमाः । दँय्दँसं थुगु कथं नेवाः नखः स्यंक पात्र पिकायेगु ज्या यानावयाच्वंगु नेपाल पाचाङ्ग समितियात थासय् हयेगु जरुरी दु । नेपाल पाचाङ्ग समितिं थःपिनिगु कलुषित ज्याखँ बन्द मयाःसा नेवाः समाजं बहिष्कार यायेमाः । औंशी खुन्हु म्हपुजा व नेपाल सम्वत् हिलीगु धाइगुया ल्यूने छु गुगु उद्देश्य सुलाच्वंगु दु नेवाःतय्सं स्पष्ट यायेफयेमाः ।

ब्राम्हणवादीतय्गु कलुषित भावनां आः नेवाः समाजय् छुं हे थाय् मदु थ्व खँ प्रमाणित याये हे माः ।

More Stories Like this