आः थारु कल्याणकारीणी सभा अधिरकारमुखी संगठन

येँ (झीगु स्वनिगः)

नेपाःया ३० लाख थारुतय्गु मंकाःगु संगठन कथं नालातःगु थारु कल्याणकारीणी सभायात अधिकारमुखी संगठनया रुपय् हिउगु दु । नकतिनि जक क्वचाःगु थारु कल्याणकारणी सभाया २० क्वःगु महाधिवेशनं अथे सामाजिक जाति अधिकारमुखी आन्दोलनया रुपय् हिलेगु धकाः खँ क्वःछ्यूगु खः ।

थःपिनिगु मागयात राजनीतिकरण यायेगु आज्जु तयाः अथे संगठनयात हिलेगु ज्या याःगु खः । चन्द्रकुमार चौधरीयात न्हूम्ह नायः कथं ल्यःगु उगु महाधिवेशनं नेपाःया तराई लागाय् बहुप्रदेश दयेकेमाः धकाः माग नं याःगु दु । तराईयात छगू प्रदेश धकाः थीथी मधेशवादी पार्टीतय्सं तयाच्वंगु सःया विरुद्ध मदिक्क हे आन्दोलन यानाः वनेगु जुइ धकाः सभां धाःगु दु ।

थारुहट स्वायत्त प्रदेश नापं थीथी कथंया प्यंगू स्वायत्त प्रदेश दयेकेमाः धकाः उगु सभां खँ क्वःछ्यूगु खः । थ्व हे झ्वलय् वइगु १७ व १८ गते सभाया केन्द्रीय कमिटीया मुँज्या येँय् च्वनीगु जूगु दु । उगु मुँज्यां थारु समुदायया हक अधिकारया निितं गुगु कथं शान्तिपूर्ण आन्दोलन यायेगु धैगु खँय् नं सहलह ब्याकाः न्हूगु कथंया संघर्षया ज्याझ्वः पितबिइगु जुइ धकाः धाःगु दु । अथे हे लच्छि लिपा चितवनया सौराहलय् राष्ट्रिय भेला यायेगु नं तयारी याःगु दु ।