उम्मेदवारी लितकाये माः
उपसभापतिइ मनोनित जुइगु खँय् कोइराला विश्वस्त
येँ (झीगु स्वनिगः)
उपप्रधानमन्त्री नापं नेपाली कांग्रेसया केन्द्रीय दुजः सुजाता कोइरालां राष्ट्रिय सहमतिया नितिं थःगु हे पार्टीया संसदीय दलया नेता रामचन्द्र पौडेलया प्रधानमन्त्रीया उम्मेदवारं नां लितकायेमाः धकाः धयादीगु दु ।
शान्ति व संविधान निर्माणया नितिं प्याकेजय् हे सहमति मजूसां नं पौडेलं उम्मेदवारी लित कयाः राष्ट्रिय सहमतिया वातावरण दयेकेमाः धकाः वय्कलं धयादिल । कांग्रेसं आःया अवस्थाय् प्याकेजय् हे सहमति जुल धाःसा जक उम्मेदवारी लितकायेगु जुइ धकाः धयाच्वंगु इलय् कांग्रेसया हे केन्द्रीय दुजः कोइरालां अथे न्वंवानादीगुयात मनूतय्सं अर्थपूर्ण रुपं कयाहःगु दु ।
येँय् आइतवाः ग्वसाःग्वःगु साक्षात्कार ज्याझ्वलय् न्वंवासें वय्कलं धयादिल 'दकले पुलांगु व जिम्मेवार दलया नातां नं सहमति कायम जुइगु खःसा उम्मेदवारी लितकयाः न्ह्याः वनेमाः ।'
नेपाली कांग्रेसया मदुम्ह सभापति थः अबु गिरिजाप्रसाद कोइरालां सहमति सहकार्य व एकताया मन्त्र बियावंगु दावीयासें नेतृ कोइरालां कांग्रेसं आः दलगत स्वार्थयात त्वःताः सहमतिया राजनीतियात न्ह्यःने यंकेमाः धकाः नं धयादिल ।
मुलुकया नितिं शान्ति प्रकि्रया व संविधान च्वयेगु ज्यायात परिणामय् थ्यंकेगु बाहेक मेगु महत्वपूर्ण विषय मदुगु दावीयासें वय्कलं धयादिल संविधान दयेके मफत धाःसा छु जुइ धकाः सुनां नं सोचेयाःगु मदु खाली प्रधानमन्त्रीया नितिं जक पियाच्वन संविधान दयेके मफत धाःसा निरंकुशता वइ ।
वय्कलं सत्ता केन्द्रीत राजनीतियात त्वःताः न्ह्याः वनेमाःगु न्ह्यथसें रामचन्द्र पौडेलं उम्मदवारी लित कयाः निकास जुइगु खःसा उम्मेदवारी लित कायेमाः धकाः नं बहः बियादिल । उप प्रधानमन्त्री तकं जुयाच्वनादीम्ह कोइरालां धयादिल 'कांग्रेसया नितिं प्रधानमन्त्री सिबें शान्ति व संविधान प्रमुख खः । संविधानया नितिं कांग्रेसं त्याग यायेमाः । '
कांग्रेसया कारणं प्राप्त उपलब्धी गुमे जुइगु अवस्था ब्वलंके मज्यू । मुलुकय् संविधान दयेके मफत धाःसा दुर्घटना जुइ । दुर्घटना गुज्वःगु जुइ धकाः धाःसा धयामदी ।
नेपाःया प्रजातन्त्र समाप्त जुइत्यंगु गम्भीर षड्यन्त्रया सूचना थःत वःगु दु धकाः दावीयासें वय्कलं धयादिल 'नेपाःया प्रजातन्त्रया नितिं बांलाःगु दिन वइगु खनेमदु । जिं संकेत खनागु दु । परराष्ट्रमन्त्रीया रुपय् थःम्हं अज्वःगु षडयन्त्रया सूचना कयागु दु ।'
वय्कलं कांग्रेसया महाधिवेशनय् महामन्त्री पदया उम्मेदवारी बियाः नं नां लित कयागु धैगु उपसभापति पदय् मनोनित यायेगु धकाः थःत पार्टीया सभापति सुशिल कोइराला महामन्त्री प्रकाशमान सिंह व संसदीय दलया नेता रामचन्द्र पौडेलं मंकाः कथं प्रतिबद्धता प्वंकूगुलिं थः विश्वस्त जुयागु दु धकाः नं धयादिल ।
वय्कलं राजनीतिइ तःधंगु ज्या विश्वासं याइ धयादिसें सुना नं विश्वास त्वाःथल धाःसा राजनीतिक भविष्य हे समाप्त जुइ धकाः दावी नं यानादिल ।
