न्हूदँ न्हूकथं हने माली का

न्हूदँ वलकि मनय् छता छता खँ लुया वये यः । मोहनीया भचा भचा सूर ल्यनाच्वनीगु जुया ला मसिउ । अले न्हूदँया भिहन्तुना धकाः भौचा चिनाः शंखधरया सराद याये मखु धाःसां म्हपुजा कुन्हु छेँय् च्वनेफइमखु । दँय् दसं तुतियात चिनातःसां मन धाःसा तिंकितंक न्हुइ अले वनी व पलाः भाताभाता यानाः बसन्तपूपाखे ।

थौं नं बिचाः यानाच्वना । झी "नेपाःमि वयाच्वना"या लसय् कथुसुकेगुया लिसें छुं नं छुं ला पक्का हे यायेमाली । धाथें न्हूदँ हनेगु मेगु उपाय मदुला ?

अंगलय् शंखधरया किपा दूगु क्यालेन्डरयात तुंक स्वयाः बिचाःयानाच्वना । व शंखधर छाय् शंखधर जुल ले ? व चानचुन नां मखु । वं शंख ज्वंगुलिं वया नां शंखधर जूगु लाकि वया नां शंखधर जूगुलिं वया ल्हातिइ शंख घाकूगु ? जितः छाय् माल ? अले वया किपा छाय् जिगु क्वथाय् ? व शंखधर जूगुलिं ला ? वयात छाय् झीसं अपाय्सकं हनाच्वनागु ले ? हानं धाइ शंखधर जूगुलिं । क्या फसाद । व छाय् शंखधर धइगु का । वं ला थ्व नेपाल संवत् तयावंगु हँ । खइका । मदयेक मगाः धकाः वंतःगु संवत् दक्वस्यां मानेयात जुइका । वं ला पारुकुन्हु स्वनिगः दुने च्वपिं दक्वसिगु ऋण पुलाः दक्वसित दासं मनू दयेकूगु हँ । अले मयाइला ? हाइँ ? खइला ?

का । झी नं झी हे का । वयात हनेगु धइगु झ्याइँ झ्याइँ बाजं थानाः, लँय् वःपिं मिस्तय्त हायेकाः, हेलमेट मपुसे मोटरसाइकल ब्वाकाः, मन्त्रीतय्गु चाकडी यानाः जुइला ? थ्व ला मजिल बाः सा । यायेगु खःसा वं यानावंगु थेंज्याःगु छुं यायेमाली का । याइका साप । गन व शंखधर, गन जि मानन्धर ।

भगवानया कृपां, जिमि मांबौया धर्मं जि दुम्ह हे मखुसां निछाः नयेत थाकु थ्यंक मजू आःतक (बिइमाःपिन्सं लुटेयाःसां) । तर जिं खनाच्वना थन झीगु नेवाः समाजय् ज्वाँय ज्वाँय् तिसातिना जुइपिं जक मखु थः मस्तय्त आखः निगः ब्वंकेमफया कां यानातयेमाःपिं नं दु । ध्यबा दयाः नं नुगः स्यानाः मस्तय्त मब्वंकुसे सनुखय् ध्यबा ध्वगिकाछ्वइपिं नं मदुगु ला मखु, तर गुलिगुलिस्यां धाथें ध्यबा हे मदयाः मस्तय्त स्कुल मछ्वः, मायाचिया अबुंथें । स्कूल ला स्कूल - लय् नीद्वः स्वीद्वः पुलेमाःगु स्कुल नं थन हे दु, लछिया निसः स्वसः जक पुलेवं गाःगु (अझ सैध्दान्तिक कथं ध्यबा हे पुलेम्वाःगु) स्कूल नं झीथाय् दु । जिं बिचाः, याना । जिं मेगु छुं यायेमफुसां थ्व जुनिइ छम्ह नेवाः मचायात सरकारी स्कुलया लँ तक ला क्यनेफु नि । थुकिया निंतिं जिं दछिया निद्वः दां मुंकूसा गाः । मफइ ला ?

झी चलन हे जुइधुंकल वं मयाः, थ्वं मयाः, फल्नां मिलेमजुइक यात, धिस्कां स्यंकल । अथे हालाच्वनेगु पलेसा बरु याकःचा वनाः छम्ह मदुम्ह मफुम्हस्या छेँय् वनाः वया मचायात कमसेकम आधारभूत शिक्षा एसएलसि तक बिइके फत धाःसा जिं धाथें शंखधरयात लुमंकागु थें च्वनी । जिं थथे यायेफत धाःसा मेपिन्सं नं याये जिउ खनीका धकाः थुल धाःसा ला गुलिस्यां गुलिस्यां दुपिन्सं फुपिन्सं बांलाःगु बोर्डिग स्कुलय् हे तःसा झं बांलाइ । अझ गुलिखे भाषा नेवाःत प्रति मतिना दुपिं ला विदेशय् नं दु उमिसं नं अथे हे याना यंकल धाःसा ला झं हे बांलाइ । यक्व यायेम्वाः छम्हस्यां छम्ह याःसा गाः । जिं बिचाः याना थ्व स्वन्ति निसें मालाः थुगुसिइया न्हूगु शैक्षिक सत्र निसें थथे यायेमाली का । छिगु नं अथे यायेगु मन दु लाकि ?

More Stories Like this