न्हूगु इतिहास दयेकाः वर्ल्ड एक्स्पो २०१० क्वचाल

न्हूगु इतिहास सहित वर्ल्ड एक्स्पो २०१० जनगणतन्त्र चीनया सांघाईलय् थौ क्वचाल । खुला न्ह्यः निसें १८४ दिं तक न्ह्याःगु थुगु एक्स्पोयात तःजिक ग्वसाः ग्वया हिलंयात हे छथाय् हयाः सामाजिक व सांस्कृति ख्लय् नं चीनं थःगु बिस्कं पहिचान त्वःतुगु दु ।

झःझः धायेकः क्वचाःगु वर्ल्ड एक्स्पो २०१० नापं चीनं हिलंया दक्वं ख्यलय् थःगु वर्चश्व कायम यायेगु अभियानय् छगू न्हूगु अप्पा तनेगु ज्या याःगु दु । थ्वस्वयां न्ह्यः सन् २००८य् सफलतापूर्व ओलम्पिकया ग्वसाः ग्वया जक मखु उकी दकलय् अप्व लुँया पदक त्याकाः नं कासा ख्यलय् थःगु वर्चश्व चीनं क्यंगु खः । वयां लिपा सन् २००९य् जनगणतन्त्र चीन जूगु ६०दँ दुगु लसताय् याःगु छगू तःजिगु सैनिक प्रदर्शनी पाखें नं चीनं हमिलय् थःगु बिस्कं पहिचान क्यंगु खः ।

थ्वहे झ्वःयात थु दँय् चीनं वर्ल्ड एक्स्पो ग्वसाःग्वया सामाजिक व सांस्कृतक ख्यलय् क्यंगु खः । सन् १८५१स संयुक्त अधिराज्यय् न्हापांगु शुरु जूगु वर्ल्ड एक्स्पो थुगुसी न्हापांगु खुसी विकासोन्मुख देशं ग्वसाः ग्वःगु खः । 'बांलागु शहर, बांलागु जीवन' शीर्षक तयाः न्ह्याःगु ३९गू वर्ल्ड एक्स्पो छगू तःजिगु ज्याझ्वः सहित चिनियाँ प्रधानमन्त्री बेन जिया बाओं एक्स्पो क्वचाःगु घोषणा यानादीगु खः ।

५.२८ वर्गस्क्वायर किलोमिटरय् २४६ देय् व अन्तराष्ट्रिय संघ संस्थातय्सं थःथःगु पेभिलियन देय्काः ब्वति काःगु एक्स्पोलय् शहरी सभ्यता, शहरी विकासया अनुभव, मानवीय जीवया न्हूगु पहुँच व न्हूगु शताब्दीइ ज्या यायेगु वातावरण सम्बन्धी खँत ब्वयेगु ज्या जूगु खः ।

हिलंन्यंकया ७ करोड मनूतय्सं ब्वति काइगु अनुमान यानातःगु एक्स्पोलय् ग्वसाः खलया अमुनमान स्वयां ३ करोड अप्व मनूतय्सं ब्वति काःगु खः । १८४ दिंया दुने आः तक जूगु एक्स्पोलय् हे दकलय् अप्व ७३ करोड मनूतय्सं ब्वति काःगु खः । थ्वनापं थुगुसी एक्स्पोलय् ब्वति काःगु देय्या कथं नं न्हूगु किर्तिमान जूगु दुसाः अप्व मनूतय्सं अवलोकन याःगु कथं नं न्हूगु इतिहास वनेजूगु दु ।

थंज्याःगु थीथी इतिहास च्वयेत सफल जूगु एक्स्पो आः सन् २०१२य् दक्षिण कोरियाया यशु शहरय् नापलायेगु बचं सहित क्वचाःगु खः ।

More Stories Like this