संयन्त्रया नेतृत्व कार्यकारी प्रमुख
येँ (सन्ध्या टाइम्स)/प्रधानन्यायाधीश, न्यायाधीश नापं संवैधानिक निकायया पदाधिकारीया नियुक्ति याइगु स्वतन्त्र संवैधानिक संयन्त्रया नेतृत्व कार्यकारी प्रमुखयात याके बीगु धकाः न्हूगु संविधानय् च्वयेत उच्चस्तरीय राजनीतिक कार्यदल सहमत जूगु दु ।
न्हूगु संविधान निर्माणया नितिं विवाद जुयाच्वंगु विषयय् सहमति ब्वलंकेत संविधानसभाय् दुथ्याःगु २७ दलया सहमति कथं दयेकूगु उगु कार्यदलया थौं सुथय् च्वंगु बैठकं थ्व खँ क्वःछिउगु खः ।
कार्यकारी प्रमुख राष्ट्रपति जुइ लाकि प्रधानमन्त्री जुइ धइगु खँय् आः तक नं दलया नेतातय्गु दथुइ विवाद हे जुयाच्वंगु दु। न्ह्याम्ह हे कार्यकारी प्रमुख जूसां स्वतन्त्र संयन्त्रया नेतृत्व धाःसा कार्यकारी प्रमुखं हे याइ धकाः नेतातय् दथुइ सहमति जूगु खः ।
उगु स्वतन्त्र निकायया नेतृत्व कार्यकारी प्रमुखं यानादीसा उकी सभामुख, प्रमुख प्रतिपक्ष दलया नेता व प्रधानन्यायधीश च्वनेगु धकाः नं दलया नेतातय्गु दथुइ सहमति जूगु दु। उगु संयन्त्रय् मेमेपिं सु सु तयेगु धइगु खँय् धाःसा सहमति जूगु मदुनि ।
मुँज्या लिपा कार्यदलया कजि नापं एकीकृत माओवादीया अध्यक्ष प्रचण्डं आः गठन यायेगु स्वतन्त्र निकायया नेतृत्वया विषययात कयाः खँ क्वःछिनागु दु धकाः संचारकर्मीतय्त धयादिल ।
उगु निकायया काम, कर्तब्य, अधिकार व संरचनाया बारे सहमति जुइगु ल्यं दनि धासें वय्कलं संवैधानिक परिषद् बाय् मेगु छुं नां तयेगु विषयय् नं विवाद मदु धकाः धयादिल ।
कांग्रेस संसदीय दलया नेता रामचन्द्र पौडेल, एमालेया अध्यक्ष झलनाथ खनाल, नेमकिपाया अध्यक्ष नारायणमान बिजुक्छे नापं थीथी दलया नेतात लगायत न्हय्म्हेसिया उगु कार्यदलया वंगु शुक्रवाः च्वंगु मुँज्यां प्रधानन्यायाधीश, न्यायाधीश व संवैधानिक निकायया पदाधिकारी स्वतन्त्र निकायपाखें यायेगु खँ क्वःछिउगु खः ।
