प्रचण्डं हयाच्वंगु स्वंगू देय्या सुरक्षा सवाल

माओवादीया अध्यक्ष प्रचण्डं आः नकतिनि यानादीगु चीन भ्रमण लिपा छगू न्हूगु प्रस्ताव न्ह्यःने तयादीगु दु। वय्कःया प्रस्ताव खः, नेपाः, भारत व चीन दथुइ छगू सुरक्षा सहमति यायेगु। वय्कलं राजनीतिइ 'फ्लोर' यानादीगु थ्व बिचाःयात सुनां नं खास हे चिउताः तयाच्वंगु मदुसां वय्कलं धाःसा लगातार हे थ्व बिचाः न्ह्यःने हयां तुं च्वंगु दु। खतुं वय्कलं हयादीगु थ्व प्रस्तावया पूर्ण व्याख्या अझ नं जूगु मदुनिसा उकियात औपचारिक रुपं वय्कलं गनं तयादीगु नं मदुनि। वय्कलं चीनं लिहां वयेधुंकाः न्ह्यःने हयादीगु प्रस्ताव जूगु कारणं उकियात भारतं शंकाया मिखां स्वइगु स्वाभाविक खः। लिसें नेपाः थौं गुगु राजनीतिक गन्जागोलं न्ह्याः वनाच्वंगु खः अज्याःगु इलय् वयाः थज्याःगु प्रस्ताव न्ह्यःने तयेगु धइगु पाहांचःर्‍हेबलय् मालश्री हाले थें जक खः। वय्कः नेपाःया तःधंगु पार्टीया छम्ह जिम्मेवार नेता जूगु कारणं थ्व इलय् वय्कःया ध्यान थःगु देशया निं समस्या समाधान यायेगुपाखे वनेमाःगु खः। थुकथंया क्षेत्रीय राजनीतिया खँ वय्कलं लिपा जक पिकयादीसा व सान्दर्भिक जुइगु खइ। उकिसनं थौंकन्हय् भारत व चीनया स्वापू न्हापा थें नतुसुतु हे मदुगु अवस्थाय् थें मखु। थज्याःगु छुं सहमति दयेकेमाःगु खःसा व नेपाःया मध्यस्थताय् मखु उपिं निगू देय् थः हे जानाः नं दयेकेफु। यदि अथे मखु, भारतयात चीनया सन्देश थ्यंका बीगु तह तक जक प्रचण्डया भूमिका खःसा व पाय्छि हे खः। वयां अप्वः आःया इलय् प्रचण्डजुया ध्यान उखे मवँसे थःगु देय्या आन्तरिक समस्या समाधान यायेगुपाखे हे केन्द्रित जूसा व बांलाइगु खइ ।

More Stories Like this