नेता बदनाम कुर्सीया लागिं

नरेन्द्रमान श्रेष्ठ गोंगजु

नेपाःयात हलिमय् सगरमाथा दुगु, गौतम बुद्धया जन्म जूगु, कला संस्कृतिया तःमिगु अले शान्ति क्षेत्र देय् धकाः म्हसिउ तर थौंकन्हय् नेपाःया म्हसीका हिलेधुंकल। थौंकन्हय् नेपाःया म्हसीका धइगु झिंप्यक्वः तक चुनाव यानाः नं प्रधानमन्त्री छम्ह हे ल्यये मफुगु देश अले विश्वय् दकलय् अप्वः कामचलाउ सरकारं राज याःगु धकाः परिचित जुयाच्वंगु दु। प्रधानमन्त्रीया चुनावय् दकलय् अप्वः पराजित जूम्ह नेता नेपाली कांग्रेसया रामचन्द्र पौडेल अले लिउ एनेकपा माओवादीया अध्यक्ष पुष्प कमल दहाल जूगु दु। प्रधानमन्त्रीया चुनावय् झिंप्यक्वः तक पराजित जुइधुंकूसां प्रधानमन्त्री जुयां त्वःतेगु धकाः याकःचासां ब्वाँय् वनाच्वंम्ह कुर्सी प्रधान नेताया कारणं नेपाःया छवि हलिमय् बांमलानाच्वंगु दु। नेतातय्गु थज्याःगु हे प्रवृत्तिं यानाः नेतात बदनाम जुयाच्वंगु खः।
नेपाः कृषि प्रधान देय् खः अले 'हरियो वन नेपालको धन' धाःगु झीसं न्हापांनिसें न्यना वयाच्वनागु दु। तर थौंकन्हय् 'हरियो वन नेपालको धन' धइगु धापुती जक सीमित जुयाच्वंगु दु अले नेपाः कृषि प्रधान मखुसे कुर्सी प्रधान देय् जुयाच्वंगु दु। नेपाःया राजनीति याब्इपिं नेतातय्गु निंतिं प्रधानमन्त्रीया कुर्सी हे म्वायेगु आधार जक मखुसे थःगु आत्मा हे भाःपियाच्वंगु दु। प्रधानमन्त्रीया कुर्सीया निंतिं नेपाःया ततःधंगु पार्टीया ततःधंपिं नेतात लाज शरम हे त्वःताः ब्वाँय्�ब्वाँय् जुयाच्वंगु दु। थुमिगु निंतिं थःगु म्हय् बरु लं मदुसां जिउ तर प्रधानमन्त्रीया कुर्सी धाःसा मदयेक मगाः। नेतातय्गु थुज्वःगु हे व्यवहार नेपाः व नेपाःमिया निंतिं तःधंगु दुर्भाग्य जुयाच्वंगु दु। नेपाः व नेपाःमिया निंतिं निस्वार्थ भावं सेवा याइपिं नेतात न त राणकालीन इलय् दुगु खः न त पञ्चायतकालीन शासनय् हे दत, न बहुदलीय प्रजातन्त्रय् दु अले न त लोकतन्त्र व गणतन्त्रय् हे दु ।

नेपाःया राजनीतिइ गुज्वःकथंया घटनात जुयाच्वंगु दु सायद थुज्वःगु घटनात हलिंया राजनीतिइ तक नं मजू जुइ। नेपालय् प्रधानमन्त्री छनौटया निंतिं झिंप्यक्वः तक चुनाव जुल तर नं प्रधानमन्त्री छनौट यायेत धाःसा सफल मजुल। राजनीतिइ थुज्वःपिं नेतात नं दु गुम्ह प्रधानमन्त्रीया कुर्सी फ्यतुइया निंतिं याकःचा हे जूसां ब्वाँय् वनाच्वंगु दु तर थः याकःचा प्रधानमन्त्रीया कुर्सी फ्यतुइ मफुसां 'लाज शरम' छुं नं मचासे ब्वाँय् वनाच्वंगु दु ।

नेपाः धयागु थज्याःगु देय् खः गन हलिमय् मजू मजूगु घटनात जुइ। "कहीं नभएको जात्रा हाँडी गाउँमा" धकाः नेपाःयात हे धाःगु पाय्छि जू। निथाय् निथाय् बूम्ह नेता प्रधानमन्त्री जुइ, कामचलाउ सरकारं प्यला प्यला तक राज न्ह्याकी, प्रधानमन्त्रीया निंतिं झिंप्यक्वः तक चुनाव जूसां प्रधानमन्त्रीया छनौट याये फइमखु, प्रमया चुनावय् याकःचा जक उम्मेदवार जूसां त्याके मफइगु, चुनाव त्याके मफुम्ह याकः उम्मेदवारं उम्मेदवारी मत्वःतेगु अले संविधानसभाया सभापति निरीह जुयाच्वनीगु अले देश सञ्चालन यायेत जनतां छनौट याःपिं राजनैतिक पार्टीया नेतात विवेकहीन, बुद्धि भ्रष्ट जुयाः तमासे जुयाच्वनीगु, थः नं प्रधानमन्त्री मजुइगु अले मेपिंत नं जुइके मबीगु, देय्यात झ्वाकलय् थुनेत तल्लीन जुइगु, देय्या अर्थतन्त्र तहसनहस यायेगु ज्या जक नेपाःया राजनैतिक ख्यलय् जुयाच्वंगु दु ।

२०६२/६३ या जनआन्दोलनय् उपलब्धि धयागु राजतन्त्रया अन्त्य व गणतन्त्रया पलिस्था अले नेपाःया जनताया लागिं छगू जक उपलब्धी धयागु गणतान्त्रिक संविधान खः। तर संविधान निर्माणया लागि धकाः जनतां जिम्मा बियातःपिं ६०१ म्ह सभासद्त धाःसा संविधान निर्माण मयासे थःथःगु स्वार्थ निर्माणया ज्याय् जक जुयाच्वन। राजनैतिक पार्टीतय्गु कुर्सी मोह, सत्ता मोह अले नेतातय्गु अविवेकी, अदुरदर्शिता, अनुशासहिनता व कुबुद्धिं यानाः निदँया दुने तयार जुइमाःगु संविधान दयेकेगु स्वयाः नं थःथःगु स्वार्थय् न्ह्यज्यानाच्वंगु खनेदु। सरकार दयेकेगुली हे पंगः थनाच्वंगु दु। पार्टी दुने गुटबन्दी यायेगु, थःथःगु प्यानल दयेकेगु ज्या जक यानाच्वंगु खनेदु ।

प्रधानमन्त्रीया चुनावय् एमालें पंगः थनाच्वंगु दु। माकलं थःगु छेँ नं दयेकी मखु मेपिनिगु छेँ नं देयेके बीमखु धाःथें झिंप्यक्वःतक चुनाव जुलं नं प्रधानमन्त्री छम्ह हे ल्यये मफुगुली एमाले मू बाधक जुयाच्वंगु दु। एमाले दुने खने दयाच्वंगु गुटबन्दीं यानाः थ्व अवस्था वःगु खः। एमाले अध्यक्ष झलनाथ खनालया गुट माओवादीयात समर्थन यायेमाः धाइपिं खःसा के.पी. ओलीया प्यानल नेपाली कांग्रेसयात समर्थन यायेमाः धाइपिं खः। एमाले नेता के.पी. ओली एनेकपा माओवादीया कट्टर विरोधीकथं न्ह्यःने वयाच्वंगु दु। थ्वहे कारणं यानाः प्रधानमन्त्रीया चुनावय् निकास मवःगु खः धाःसां जिउ। एमाले नापनापं मेमेगु पार्टीतय्सं थुइकेगु याःगु खःसा २०६२/६३ या जन आन्दोलनया जनताया ल्हातिइ लाइगु धइगु छगू जक उपलब्धी विधान अले थ्वया संविधान निर्माणया ज्याय् न्ह्यानाच्वंपिं ६०१ सभासद्तय्सं जनताया हि-चःतिया कमाइ जक नयाच्वंगु दु ।

संविधानसभाया चुनावय् जनतां २५ गू राजनैतिक पार्टीया ६०१ सभासद्पिं संविधान निर्माणया लागि संविधानसभाय् छ्वःगु खः। थुपिं सभासद्पिं संविधान दयेकेगु ला गन गन सरकार दयेकेगु वातावरण नापं मदयेकुसे तमासे जुयाः प्रधानमन्त्रीया चुनावय् तटस्थ च्वनेगु धयागु जनताप्रति गद्दारी यायेगु खः। जनतां इमित संविधान दयेकेत, देश सञ्चालन यायेत, शान्ति सम्झौता पूवंकेत, जनतायात राहत चूलाकेत, देशया विकास यायेत, अर्थतन्त्र बल्लाकेत जिम्मेवारी बियाहःगु खः न कि सरकारलिसे पंगः थनाः तटस्थ च्वनाच्वनेत। भकुंग्वारा म्हिते धकाः ग्राउन्डय् कुहां वनेधुंकाः जिपिं म्हिते मखुत धकाः सुंक च्वनेगु अले म्हिते धाःपिंत नं गोल याके मबिसे गोल पोष्ट पनाच्वनेगु धयागु इज्जत मदुगु अलय् गैर जिम्मेवारी ज्या खः ।

आःया संसदय् गुगुं नं पार्टीया बहुमत मदु। संविधानसभाय् त्याका वःपिं २५गू पार्टीत अल्पमतया पार्टीत खः। अले थज्याःगु व्यवस्थापिका संसदयागु अवस्थात सहमतीय व बहुमतीय सरकार धकाः किचकिच यानाच्वनेगु एमाले थेंज्याःगु पार्टीयात ल्वःगु ज्या मखु। व्यवस्थापिका संसदय् पार्टीतय् बहुमत मदुगु कारणं थज्याःगु पार्टीं सरकार दयेकेत मेमेगु पार्टीं समर्थन मयाःसां मगाः। मेमेगु पार्टीया समर्थनं जक दयेके फइगु सरकार नं ला सहमतिया
सरकार थें हे खः धयागु खँ नेकपा एमालेया बुद्धिमान धाःपिं नेतातय्सं गथे मथूगु? आः ई धयागु संविधान निर्माण यायेगु ई खः। राजनैतिक पार्टीत बहुमतीय व सहमतीय सरकार धकाः कचवं पिकयाच्वनेगु ई मखु। संविधान दयेकेगु ई यक्व मदये धुकाः आः नं संविधान मदयेकेगु विचाः ला कि छु पार्टीतय् ? कि हाकनं संविधानसभाया ई थप यानाः जनता हि-चःतिया कमाइ भत्ताया रुपय् छ्यलेगु विचाः ला कि छु?

देशय् काम चलाउ सरकारं देशयात पूर्ण बजेट मवयाः अर्थतन्त्र व विकास निर्माणया ज्या डामाडोल जुयाच्वंगु दु। देश अस्तव्यस्त जुयाच्वंगु दु। जनतायात मदयेक मगाःगु अत्यावश्यक वस्तुतय्गु अभाव जक मखु भाः थहां वंगुया कारणं सर्वसाधारणतय्त दुःख जुयाच्वंगु दु। देशय् अभाव, अपहरण, लुटपाट, हत्या, भ्रष्टाचार आदिं लित्तुलिनाच्वंगु दु। तर देशया स्वंगू ततःधंगु पार्टीत धाःसा स्वथाय् हे स्वयाच्वंगु दु। थुमिसं थःथःगु स्वार्थ जक स्वयाच्वंगु दुसा जनता व देय्प्रति छुं नं कथंया जिम्मेवारी बहन यानाच्वंगु मदु अले स्वयेगु बिचाः नं मदु थें च्वं। उकिं थुगुसी मोहनिया मां भगवती व स्वन्तिया मां लक्ष्मीं नेतातय्त सुबुद्धि बीमा धकाः मां बरदान फ्वनाच्वना ।

More Stories Like this