वहःया पाँय्म्वः पिथन

नेपाल संवत् ११३१ न्हूदँया लसताय् भिंतुना गुथिं दँय्दसं थें थुगुसी नं भिंगु वह:या पाँय्म्वः पिथंगु दु ।

न्हय्दँ न्ह्यः निसें थीथी व्यक्तित्वतय् किपा किया:तःगु वह:या पाँय्म्व: पिथना च्वंगु गुथिं थुगुसी साहित्यसुता कर्मरथानाचार्य बोद्धऋषि महाप्राज्ञया किपा अंकित पाँय्म्वः पिथंगु खः । थौं येँय् भिंतुना गुथिया नायः सुशीलकाजी तुलाधरया सभापतित्वय् जूगु ज्याझ्वलय् मूपाहाँ प्राध्यापक माणिकलाल श्रेष्ठं उगु पाँय्म्वः उलेज्या यानादीगु खः ।

न्हूदँ ११३१ क्यनीगु जूगुलिं थुगु दँय् पिथंगु पाँय्म्वः नं झिंछस: व स्वीछगः जक पिथनागु ग्वसाःखलकं जानकारी ब्यूगु दु ।

गुथिं थौं न्ह्यक्वःगु खुसी वहःया पाँय्म्वः पिथंगु खःसा थ्वस्वयां न्ह्यः गुथिं शंखधर साख्वाः, चित्तधर हृदय, निष्ठानन्द वज्राचार्य, सिद्धिदास अमात्य, जगतसुन्दर मल्ल व योगवीर सिंह कसाःया किपा किया:तःगु वह:या पाँय्म्वः पिथनेधुंकूगु दु ।

अन्नपूर्ण ज्ञानमाला भजन खलकं ज्ञानमाला भजन हालाः शुरुयानादीगु ज्याझ्वलय् नेपालभाषा मंकाः खलः, न्हूदँ समारोह समितिया- ११३१ या नायः विपेन्द्र महर्जन, मूछ्यांजे नरेशवीर शाक्य, लाभरत्न तुलाधारजुं थःगु नुगःखँ प्वंकादीगु खःसा रत्नवीर शाक्यं ज्याझ्वः न्ह्याकादीगु खः ।

More Stories Like this