न्यायाधीश नियुक्ति बिस्कं निकायं
एमाले छगू हे मुँज्याय् छकः माओवादीनाप छकः कांग्रेसनाप
येँ (सन्ध्या टाइम्स)/न्हूगु संविधान निर्माणया निंतिं दयेकूगु उच्चस्तरीय राजनीतिक कार्यदलया थौं सुथय् च्वंगु बैठकं प्रधानन्यायाधीश व सर्वोच्च अदालतया मेमेपिं न्यायाधीशया नियुक्ति अलग्ग हे स्वतन्त्र निकायपाखें यायेगु सहमति याःगु दु ।
बैठकय् संवैधानिक परिषद वा न्याय परिषद् थें मेगु हे ब्यागलं स्वतन्त्र निकाय दयेकाः उकिया हे सिफारिसय् प्रधानन्यायाधीश व सर्वोच्चया न्यायाधीशत नियुक्त यायेगु खँय् सहमति याःगु दु। अज्याःगु स्वतन्त्र निकायया नां छु तयेगु धइगु खँय् धाःसा लिपा हाकनं सहलह जुइ धाःगु दु। बैठकं संविधानया ब्याख्या सुनां यायेगु धइगु खँया विवाद धाःसा ज्यंके मफुत ।
थ्वहे दथुइ थौं सुथय् सिंहदरवारय् च्वंगु मूमू राजनीतिक दलया शीर्ष नेतातय्गु बैठक धाःसा बिना निष्कर्ष क्वचाःगु दु। बैठकय् सहमतिया नितिं धकाः माओवादीनाप जानाः एमाले नेतातय्सं प्रधानमन्त्रीया उम्मेदवारी लित कायेत नेपाली कांग्रेसयात इनाप याःगु खःसा कांग्रेसं फुक्क खँय् सहमति मजुइकं उम्मेदवारी लित कायेगु जुइ मखु धकाः अडान काःगु खः ।
उगु हे मुँज्याय् कार्तिक मसान्तया दुने वर्तमान कामचलाउ सरकारपाखें हे बजेट हयेगु वातावरण दयेकेत नेपाली कांग्रेसनाप जानाः एमालेया नेतातय्सं माओवादीयात इनाप याःगु खःसा माओवादीं नं उकियात अस्वीकार याःगु खः। थुकथं निगुलिं प्रस्ताव अस्वीकार जुइवं बैठक बिना निष्कर्ष क्वचाःगु खः ।
