कांग्रेस धाथें हे जिम्मेवार जुइमाःगु ई

प्रधानमन्त्री ल्ययेगु लागिं संसदय् जुयाच्वंगु नाटकीय चुनावयात कयाः आः छगू ठोस निष्कर्ष पिकायेमाःगु आवश्यकता ब्वलंगु दु। माओवादीयात ध्याक्वय् लाकेगु रणनीति कथं कांग्रेसं प्रधानमन्त्री ल्ययेगु थ्व चुनावयात प्रयोग यानाच्वंगु खनेदु। धायेत ला प्रधानमन्त्री ल्ययेगु ज्या व संविधान दयेकेगु ज्या अलग अलग खः धकाः कांग्रेसं हे धायेगु यानाच्वंगु दु तर व्यवहारय् धाःसा वहे कांग्रेसं प्रधानमन्त्री चुनाव व संविधान निर्माणया ज्या नापं सेना समायोजनया ज्यायात समेत छगू हे बास्केटय् तयाः ज्या यानाच्वंगु दु। माओवादीं यायेमाःगु ज्याखंत व थःपिंसं यायेमाःगु ज्यायात नापं हे प्याकेजया रुपय् यायेगु धकाः कांग्रेसं हयाच्वंगु प्रस्तावया बांलाक व्याख्या अझं जूगु मदुनि। देशय् पूर्ण सरकार वयेधुंकाः जक याये फइगु अज्याःगु मागयात आः सम्पूर्ण प्रक्रिया हे अवरुद्ध जुइकथं न्ह्यःने तयेगु कांग्रेसया कुतः पाय्छि मखु। छम्ह हे मनू झिंस्वक्वः झिंस्वक्वः तक छगू हे चुनाव ल्वानाः नं लिच्वः पिहां मवइगु धइगु धाथें नं लज्याया विषय खः। कांग्रेसं थ्व लज्जायात वाःचायेके मफुगु धाःसा विडम्बनाया विषय खः। एमाले तःगू चरण तक तटस्थ च्वंगु खंयात कयाः कांग्रेस सभापति सुशील कोइरालां हे छक्वः धयादीगु खः, थ्व ईयात ताःहाकः यानाच्वने मते, एमालें गन तये न्ह्याः अन हे भोट तःसां जिउ। अबलय् एमालें यानाः अवरुद्ध जुयाच्वंगु प्रक्रिया आः कांग्रेसं यानाः हानं अवरुद्ध जू वंगु दु। कांग्रेसं थःत धाथें हे छगू जिम्मेवार पार्टी खः धकाः दावी यायेगु खःसा थज्याःगु मचाखँ त्वःताः आः निकास मालेत जिम्मेवारी ढंगं हे पिहां वयेमाःगु आवश्यकता दु। कांग्रेसं थःगु परिपक्वता क्यनेगु ई थ्वहे खः ।

More Stories Like this