खाडीया नेपाःमितय् विशेष सुरक्षा जुइमाः

खाडीइ अलपत्र जूपिं झिम्ह नेपाःमि मिस्त अनया नेपाली दूतावासय् शरण काः वनाच्वंगु समाचार सार्वजनिक जूगु दु। थुकिं यानाः खाडी लागाय् ज्या याः वनेगु मनस्थिति दयेकाच्वंपिं मनूतय्त अन वनेगु बारे हानं छक्वः पुनर्विचार यायेत बाध्य याना बिउगु दइ। खाडी मुलुकय् वयाः अलपत्र जूपिं मनूतय् उद्धार यायेगु ज्या जक यायां हे नेपाःया राजदूतावासं मेगु छुं ज्या याये मफयाच्वंगु खँ इलय् ब्यलय् पिहां वयेगु यानाच्वंगु दु ।

झीसं माने याये वा मयाये, खाडी वनाच्वंपिं नेपाःमितय्गु हे भरय् देश चले जुयाच्वंगु दु। देशं छुं हे प्रगति याये मफयाः हीमी चायाच्वंपिं ल्याय्म्हतय्सं खाडी वनाः थःगु लागिं ज्या चूलाकूगु जक मखु देशया लागिं रेमिटेन्स छ्वया हयेगु ज्या नं यानाच्वंगु दु। थौं नेपालय् विदेशी मुद्रा दुहां वइगु दकलय् धिसिलाःगु स्रोत हे थ्वहे जुयाच्वंगु दुसा थुकिं हे समाजयात चलायमान यानातःगु दु। अय् जूगु कारणं नेपाःमितय् यःसां मयःसां नं खाडीइ च्वनाः ज्या यानाच्वंपिं नेपाली श्रमिकतय् हक हित सुरक्षा जुइगु ज्याय् नेपाः सरकारं क्वातुक पलाः न्ह्याकेमाःगु अतिकं आवश्यक दु। थौंया इलय् नं सुं नेपाःमियात अन अलपत्र जुइकथं सुनां नं ज्या यायेगु थ्व व्यवसाययात हे खतराय् लाकेगु बराबर खः। उकिं अज्याःपिंत छुं नं पनेगु संयन्त्र विकास याये हे माः। खाडी आः नेपाःया आय आर्जन जुइगु मू लागा जूगु कारणं नेपालं छुं भचा लगानी यानाः जूसां अन च्वंपिं नेपाःमितय् समस्या बारे अनुगमन यायेगु, समस्याय् लानाच्वंपिं दुसा उद्धार याना बीगु थेंज्याःगु ज्याखँ न्ह्याकेमाःगु दु। थुकिं अन ज्या याइपिं नेपाःमितय् सुरक्षा व सम्मान नितां जुइ ।

More Stories Like this