स्वंगः मिखा स्वखे स्वः

सूर्यमान राजभण्डारी

प्राणी जगतय् स्वंगः मिखा दुम्ह सुं प्राणी दुसा व देवादी देव महाद्यःयाके जक दुगु खँ न्यना तयागु खः, धार्मिक पौराणिक बाखनय् ब्वना वयागु खः, संकिपाय् स्वया वयागु खः। स्वंगः मिखाया स्वाधिन जूगुलिं महाद्यःयाके अद्भुत, अलौकिक शक्ति दु धाइगु खः। ख नं न्ह्यागु नं स्वंगूया योग भिंगु योग धाइ, गथेकि त्रिरत्न, त्रिफला, त्रिवेणी, त्रिशूल आदि इत्यादि। तर दुर्भाग्य, नेपालय् छताजि स्वंगूया योग गज्याःगु बिजोग। थ्व बिजोगगु योग नेपाःया थौकन्हय्या स्वंगू दलया योग खः। स्वंगू दलया योग अर्थात "त्रिदल" नेपाःमितय् निंतिं माकुगु फल जुइ माःगु खः।

स्वंगू दलया शक्ति त्रिशक्ति जुयाः देशय् ब्वलनाच्वंगु भ्रष्टाचार, गरिबी, अशिक्षा न्हंके माःगु खः। तर छु याये, स्वंगू दलया स्वंगू मति, स्वंगू हे दृष्टि, अले व स्वंगू दलया स्वंगः मिखां स्वथाय् हे स्वयाः देशया छु गति? आः उबलय् लिपांगु जनआन्दोलनय् धाःसा स्वंगः मिखा जूसां छपाः हे ख्वाः जूगु खः, छप्वाः हे म्हुतु जूगु खः अले सकलें नेपाःमितय्सं नं उमित हे घ्वाःगु खः। स्वयेबलय् मिखा स्वंगः जूसां थ्यंमथ्यं स्वंगू करोड नेपाःमितय्गु घ्वासां संविधानसभा वल, गणतन्त्र वल, मेमेगु नं यक्व मन्त्रत वल। संघियता, स्वायत्तता, धर्म, भाषा, जाति आदि इत्यादि तःता खँ नं जुल। न्हूगु संविधान च्वयेगु धकाः प्रण नं जुल। चुनावय् नं व हे स्वंगः मिखा त्यय्लात। उबलय् मिखा स्वंगः जूसां दृष्टि छगू हे जुल, आज्जू तःगू जूसां शान्ति, संविधान व सेना समायोजनयात दकलय् न्हापं ल्यःगु जुल। जनतायात थ्व खँ यःगु जुल। तर ई न्ह्याना वंलिसे त्रिदलया दृष्टिभ्रम जुया वल। इलय् हे न्हूगु संविधान वइ धकाः जनता पियाच्वन तर संविधान च्वये धकाः वंपिं ला सत्तायात जक बः बियाच्वन। राज्य सुथां लाक्क न्ह्याकेया निंतिं राजनैतिक शक्ति छधी जुइमाःगु खः तर थन सत्ताया निंतिं सकलें अगति जुयाच्वन। थथे धायेवं थौंकन्हय् नेपालय् सत्ताया निंतिं जुयाच्वंगु चुनाव लुमना वइ। प्रधानमन्त्री जुइ मफुसां प्रधानमन्त्रीया उम्मेदवार जक जूसां जुयाः च्वनेगु हं। द्वापर युगय् रामचन्द्रं राजकाज त्वःताः बनवास वन हं, स्वयादिसँ, थौकन्हय्या रामचन्द्रं मत्याइगु चुनावय् उम्मेदवारी छगू हे मत्वःतुसे जनतायात न्हीकाच्वन। अले वहे चुनावय् छपुचः माननीय सभासदत दुरुयात भौ पासा जुयाच्वन, मेपिं माननीय सभासदत बुँख्याःचा जुयाः तमासा स्वयाच्वन।

खँ स्वंगः मिखा अर्थात स्वंगू दलया खः। धायेत ला स्वंगः मिखा स्वथाय् जूसां छगः हे खः, मिले जुयाः ज्या याये धाइगु, छथाय् हे च्वनाः समस्या ज्यंके धाइगु तर धात्थें धायेगु खःसा आः तक नं छुं याःगु मदुनि, माःगु खँय् छुं हे सहमति याये फुगु मदुनि। खा न्हापा कि ख्यें न्हापा थेंज्यागु खँय् तक्यनाः मजुइगु सहमति मालां लुया वइ ला? छम्हेसिनं छता त्वःति धाल, मेम्हेसिनं मेता त्वःति धाल, आः तक सुनानं छुं हे त्वःतूगु मखुनि अले देश व जनताया निंतिं सिन्का छपु नं त्वःथूगु मदुनि। बरु थवंथवय् क्वात्तुक्वानाः, ख्याः बछि नी बछि यानाः ल्वानाः जनतायात हुसुलुं पुइकाच्वन। उकुन्हु जेठ १४ गते आर्यघाटय् थ्यंगु अन्तरिम संविधानयात दछि म्वाकेगु कुतः मयाःगु खःसा थौ देय् छु जुल जुइ? अन्तरिम संविधानयात ला म्वाकल, अले म्वाःम्ह सरकारयात क्वःथल। स्वंगू दल स्वखे स्वयाः न्हूगु संविधान ला गन गन न्हूम्ह सरकार छम्ह हे बुइके फुगु मखुनि। थांैकन्हय्या सरकार ग्वारातूगु न्हि ल्याः खायेगु खःसा उकुन्हु हे लत्या सिधयेधुंकल मखुला? न्ह्यइपुगु खँ छु धायेबलय् सरकार ग्वारातूगु सछिन्हु फूगुया लसताय् "हनिमून" नं न्यायेकल हं। गनं मदुगु जात्रा हाँडी गांया धाः थें गनं मदुगु सरकार नेपाःगाःया जुल। स्वंगः मिखा स्वखे स्वयाः देय् बर्बाद जुल ।
www.thesuryaman.blogspot.com

More Stories Like this