अँ, अले छु जुल ले तारेमाम् भगवान ?

- राजा शाक्य

'शेखरदाइ! जिं मोबाइलया स्वीच-अफ यानातयागु मखु। छिगु मोबाइल-कलया गं हे मन्याः । अय्सां गबलय् मस्यु मीस-कलय् छिगु नां खनाः फोन यानागु …'

थुलि छु धया शेखरदाइ झर्के जुल, 'यय्… अय्सा मीस-कलय् नां खनाः जक फोन यानादियागु का मखुला गपाय्च्वः ह्वाय्च्वाय् याये सःगु धयागु नि थ्व यमित धयापिं! स्वयादिसँ जि छिकिपंलिसे हेटौडा वये मखंसां माया दु जिके । जि छम्हसिनं फोन मयाःसा छितः सुनां फोन याइ । …अँ, का धयादिसँ । हेटौडाय् बाखं मुँज्या व सलहल ज्याझ्वः गथे जुल ? तसकं न्यने आतुर जुयाच्वन । गुलि फोन याना ।लगे हे मजू ।'

'खः शेखरदाइ! साप न्ह्याइपुसे च्वं । हेटौडायापिं नं यानाः जिपिं फुक्कफाक्क यायेबलय् स्वीन्याम्हति दु । न्हापां अन थःथःगु म्हसीका ब्वयेगु ज्या जुल । लिपा नयेनी धुंकाः झिंन्याम्ह झिंखुम्ह बाखं च्वमिपिंसं थःथःगु बाखं न्यंकेगु ज्या जुल । अनंलि बाखंया बारे सहलह नं ब्यात । दुग्ययेक । थम्हं चाः थें थम्हं थू थें …।'

'अँ शेखर दाइ! छितः साप सुख मदयाच्वन । मोटर साइकलय् पेट्रोल प्वंका च्वंबलय् मि च्याःम्ह छिकपिनि काय्चाभौया उसाँय् आः गय् च्वं अथे हे तिनि ला भचा हे क्वमलाः धयादिया ला …। छु याये अथे हे खः । मिं नगु घाः धयागु काचाक्क लंके थाकु । छु याये धैर्य यानादिसँ । …'

'खः जिमित नं हेटौडा थ्यनेत नीक्वय् नीन्याक्वय् ति ल्यंदनिबलय् चक्का जामया लँपंख्याःतय्सं भ्वय्भ्वय् हे कंकाबिल । कुर्कुरे धाःथाय् । मस्यु अन गांयाम्ह थारु जातियाम्ह मनूयात बसं क्यःगु जुयाच्वन । सीम्ह अन लँय्सं ग्वतुकातःगु दु । ग्वाराग्वारा ल्वहंया पःखाः दनाः लँ फुक्क ध्याक्क । ध्याम्म। थुखें व उखें यानाः झिगू किलोमिटर ति लँ धी चिनाच्वन । चक्का जाम । लँ मचाः । नेपाल बन्द । सरकार व प्रशासनया विरोध यायेगु छगू अःपुगु आन्दोलन । न पुलिसया चिउताः न सरकारया चिउताः । ल्वहंमाय् तयाः नचुयाच्वंपिं जनता हे मखुला ?

हानं झीगु बस ला अजाःगु भाडा बस नं मखु पेसेन्जर बस नं मखु । 'बाखं दबू"या साहित्यिक यात्रा यानाच्वनापिं । अय्सां इमित छुकिया चिउताः धकाः । गुलि ह्ययेका । गुलि धया । अय्क छक्वः नं फहिला मस्वः ।

अहो! विडम्बना ला विडम्बना हे खः । सीम्ह सु जुइ । वया जःपिं । वया पासािपं । अहो! गन वनावःम्ह जुइ व मनू । चान्हसिया बसं कुहां वःगु हँ । पासा छम्ह नाप लँ त्वाल्हाःम्ह हँ । पासाम्ह बचे जुल खनी । वयात जक बसं घ्वानाः चातुवाका थकल हँ । गुगु बसं घ्वाःगु जुइ । गुगु ट्रकं चात्तुवाकूगु जुइ । खिचा सी ला धों सी ला थें जुइक । सुयातं ज्वने फुगु मखु ।पुलिसं मालेगु ज्या मयाः हँ । चिउताः हे मतः हँ । चान्हय् बसं क्यःगु खः नम्बर प्लेट नं मसिउ हँ । मोटरं बिसिउँ वंम्ह गनं ज्वने फइ हँ । दोषीयात कारर्वाही मयायेकं आन्दोलन दीमखु हँ । लँ चाली मखु हँ । क्षतिपूर्ति मबीक खँ हे मदु हँ । हानं पुलिसं 'दसि हे मदु । साक्षि हे मदु । सुयात ज्वनेगु हँ । अय्सां व सीम्ह मनूयात शहीद घोषणा यायेमाः धयाच्वंगु मदु । थ्व ला धन्य खः । तर क्षतिपूर्ति कायेगुलिइ इमिसं सलं वांन्यानाच्वन । अहो! छु यायेगु का आः… ।

'अँ अँ अँ ! अले छु जुल ले तारेमाम् भगवान - शेखर दाइनं झन उत्सुकता ब्वल ।

'अले छु जुल धायेगु आः … हेटौडाय् थ्यंकेत अनया लोकल बसं वनेत झिगू झिगू किलोमिटर न्यासि वनेगु तागत सुयाकें मदु । मिस्त व मस्त नं दु । हानं थःथःगु सामान नं दु । जि ला आतक मोटरसाइकल गयाः ख्वप तक थ्यंकेत नं थाकुचाःम्ह । हानं कलाकार भृगुराम दाइ युरिक आइसिद ल्वचं ग्रस्तम्ह । खुत्यां खुत्यां कयाः जुइमाःम्ह । अपाय्हाः लँ न्यासि वनेगु सुया तागत?'

अले जिमिसं वयातं थ्वयातं फोन याना । तर फुक्कसिया मोबाइलं चक्का जाम यानाच्वन । घुँइतुँइ घुँइतुँइ सः जक । जििपं प्यक्वय् गुँया लँय् तन । तुंथिइ कुतु वनाच्वंपिं जिमिगु सः सुनां न्यनी । पि्रुक्वेन्सी मदुगु हँ । टावर मदुगु हँ । नेटवर्क हे गडबड हँ । जिमिसं छुं खँ हे ध्वाथुइके मफु । सुविधा दयाः नं धोकाया धोका जुइ थ्व टेलिफोनया लहना । भौया ख्याः छुँया नी ।

का स्व रे जिपिं अन अन हे च्वंपिं पासापिनि दथुइ तकं वं वयात वं वयात फोन मवंगु धयागु नं । … हरे उथाय् छझाः ला मोबाइल मिबाइल नं पौ पुइक वांछ्वया बी मास्ति वल । तर सकसिनं मोबाइलयात भ्वंग्वारा थें तिस्सिनाः म्हूचिना तया । जिमित थःगु देश नं परदेश जुल ।

लिपा लोकल पसलय् वनाः फोन यायेगु सल्हा साहुति ब्यात । क्त्म् क्ष्क्म् पसलय् वनेत बजारय् दुहां वना । 'बाखं दबू'या संयोजक नायः लक्ष्मण राजवंशीयात हेटौडाय् फोनं स्वापू तयेगु ग्वसाः ग्वया । वय्कः प्यम्हन्याम्ह बाखं च्वमि मय्जुपिं कलाकार रामकृष्ण दुवाल अले ग्वाहालिमित कघानाः सुथन्हापां हे जीपं झाःगु । जिपिं थ्यनेवं नकेत्वंके ताःलाकेत चिउताःया म्हे पाछायावंम्ह । लाःसा जिपिं 'थ्यनीन' धकाः ब्याक्क घासाघिसा ध्वःखनाः जिमित लसकुस यायेत इधूथिधू जुयाच्वन जुइ ।

बल्लबल्ल टेलिफोन यायेत झ्वःछुनाच्वंपिं गाहाकितय् पाः क्वचायेकाः जिमिगु पाः वल । जिमिसं लक्ष्मणदाइया फोनयात सःता । तुइँया… तुइँया हल्लो! लक्ष्मणदाइया मोबाइलय् गनं मदिसे याः न्यात । गुरुजुया पल्टनं बधाइँ न्यायेकू थें भ्वय्भ्वय् कनाः थःपिंत जूगु खँ कना । - 'मक्ष्मणदाइ! जिपिं ला थन ध्वंप्वाः तिउ थें चक्का जामय् फंसे जुयाच्वन । आमकन थ्यंकेत पीगू किलो वयेमानि हँ । आः गथे यानाः वयेगु थन ला जिमिगु मोबाइल छुं नं चले मजू । बल्ल लोकल फोनं तिनि छिनाप स्वापू दत । आमकनं थन तक वयेगु छगः बसया ग्वसाः ग्वयेफइ ला ? नत्रसा ला जिपिं अनलाः थनलाः मदइगु जुल ।'

न्हाय्पनं मताःम्ह लक्ष्मण राजवंशीं काचाकाचां उत्सुकता ब्वयाः फोन ल्ह्वन नं जिमिगु खँ हे जाम जुयाः मताया वन । - 'आसे! छुं हे तायेमदु । जिं ला छुं हे मताः । थन सुदर्शनजीलिसे खँ ल्हानादिसँ ।' धकाः धयाहल ।

आः सुदर्शनजी धाःम्ह सु जुइ । लाःसा अनयाम्ह हे मनू ला । मखुसा सिद्धार्थ वनस्थलीयाम्ह नं जुइफु । न्ह्याथेसां छत्थुं जिगु नां कयाः वय्कलं धयादिल - 'राजा जी! छिकिपं आमकन फोनय् तुं हे च्वंच्वनादिसँ । जिमिसं छुं नं छुं ग्वसाः ग्वये ।'

फोन ध्याक्क दित । जिपिं लुखा मचाःगु छेँ क्वय् थें अन हे पियाच्वना । मरि कुर्का हइम्ह क्वःया क्वसं च्वंम्ह ध्वंचा थें ।

छुं ई लिपा फोनया गं न्यात । जिमिगु हे जुइ धकाः काचाक्क ल्ह्वना । हानं सुदर्शनजीयागु हे फोन खत । वय्कलं अःपुक सल्लाह बियादिल । -
'राजाजी! आमकन झिगू किलोमिटर तिं मयाक बस ट्रक जाम जुयाच्वंगु खँ न्यना । छिकिपंत काः वयेत आमकन तक बस थ्यंके थाकु । छिकिपं थन मोटर वःथाय् तक जक जूसां न्यासि वयेगु सम्भव मजू । थन यातायात बस व्यवस्थापन समितियापिंके न्यना स्वयाबलय् बसं हे मनू क्यःगु खःला मखुला हँ । लाःसा सुनानं स्यानाः अन वांछ्वये हःगु नं जुइफु हँ । हानं चान्हय् गुगु बसं क्यःगु गुगु ट्रकं क्यःगु धकाः सीके थाकु हँ । उकिं थौं आमकन च्वंच्वनेगु पाय्छि जुइमखु । बहनी जुयावःलिसे ग्यानापुइ । थारुत बहनी जूलिसे अय्लाः ईलाः त्वनाः पिहां वयेफु । हानं अप्पां अप्पां कयेकाः बस तछ्यानाबी फु । उकिं थौं छन्हु छिकिपं टाँडिइसां नारायणघातय्सां च्वंझासँ । बरु कन्हय् सुथय् न्हापनं लँ चालेवं थुखे हे झासँ । का थ्व हे बेस जुइ का ।'

जिपिं छेँनं पितिना हःपिं मस्त थें अनलाः थनलाः मदु जुल । किसि किसि ल्वानाः चुं दंगु घाँय् जुयाः चक्का जामया धुफ्वः ब्वयेकाः कुरकुरें लिहां वया । थुन्नां थुन्नां चुइक टाँडिइ च्वनेगु दापा जुइकाः नारायणघाटया पःखालय् ध्याक्क न्याका । खिउँखिउँ धाये धुंकल । लः त्वने प्याः चाल । प्वाः सुखू चिनाः म्हम्हि हे क्वलः लुयावन । सकलें हाप्वः दं । फबंजाः पसलय् व घिरिघिरि खःचा पसलय् सपानिचा जुयाः हय्भुं वन। प्रा. नरमदेश्वर प्रधान व बसन्त महर्जन म्हसिउम्ह पासा छम्ह दु धकाः बाणिज्य संघया ज्याकू माःवन । तर सुनानं मब्वंक वःपिं साहित्यकार पाहांपिंत नाला कायेत छाय् करं क्यनी । जिमित अन बास मंत । अले होटल लजया शरणय् वनेगु करं क्यन ।

का स्व रे, जिपिं ब्यापार यायेत वनापिं मखु न तिर्थ यात्रा हे वनापिं खः न देश दर्शन यायेत वनापिं यात्रुत हे खः । अनया नेवाःत लिसे भ्यलय् पुनाः छगू बाखं मुँज्या व सहलह यायेत हे जक मखा । अनया ब्याक्क यातायात ग्वाहालि व नयेत्वने च्वनेगु सुबिधा बाखंच्वमि भाजु लक्ष्मण राजवंशीया लहनाय् वयािपं । जिमि थःथःगु म्हिचाय् गुलि ध्यबा दु मदु छुं मसिउ । सुयातं छुं न्यनेगु ह्याउ हे तनावन । छालय् मग्ययावन । अय्सां बहनिइ लजय् आकाझाकाय् बासं च्वनेमाल । रेष्टुराँय् बेलि यायेमाल । मतिइ मवं अथे आकाझाकाय् खर्च घानावये माली धकाः …।

हरे! छिं मसिउ । हेटौडां लिहां वयेत नं सुथय् अन हे जा नयाः वयेगु ग्वसाः । तर जिमित कुरकुरेया चक्का जामया मिं पुनाच्वंगु हे दनि । जिपिं छेँ लिमथ्यनी धकाः ग्यात । अले म्हीग थें जुइ धकाः कौला जक यानाः याकनं येँयात आज्जु लिनाः वया । घौछि घौत्या जक छु लिफः हे मस्वसे वये धुन लँय् हानं वाःचाःमदयेक चक्का जामया लुफिं हात । 'छुकिया जाम' धकाः न्यनास्वयां NTC या नेटवर्कं ज्या मबिउगुलिं हँ । आः मोबाइल नेटवर्कया जाम ला ख हे खत । तर थन ला सर्वसाधारण जनताया न्ह्यप्पु हे जाम यानाबिल धया । आः थन लोकतन्त्र वये धुंकाः नं जनतां गुलि तक जक यातनाया मार नये माली तिनि जुइ मसिउ । थ्व हे गणतन्त्रात्मक लोकतन्त्रया निंतिं झीसं वःदँ वःदँ मछि न्ह्यवंनिसें गुलि आतंक मचे याके धुन । गुलि टायरया कुँ घुत्के धुन । थःगु हे ल्हाःतुति त्वःधू थें गुलि तोडफोड याये धुन । नेपाल बन्द यानाः थःथम्हंतुं गुलि कुंकाच्वने धुन । अधिकारया निंतिं धकाः म्वाःब्वय् वने माःथाय् भुति ब्वय् वनाच्वनापिं झीपिं सुयातं छुं खँ कने हे मछाले धुन ।

शेखरदाइलिसेया ताःहाकःगु वार्ता न्ह्यइपुसे च्वंगु छसासः झसुकाः पिज्वल । -
अय्सां छिकपिनिगु बाखं यात्रा न्ह्याइपुसे च्वं हे धायेमाः । चक्का जाम नं छिकपिनिगु ज्याझ्वलय् मथ्याःगु छगू अनुभव जुल धायेमाः । का सा ताःहाकः फोनय् खँ जुल । जिगु ध्यबा गुलि वन जुइ आः । छु याये! जिं मयायेकं छिकिपंसं छगू कल हे टेलिफाने याइगु नं मखु । साप हे हेपय् याः छिकिपिंसं ।

More Stories Like this