नेपाःया प्रहरी चौकीइ भारतीयतपाखें आक्रमण
येँ (सन्ध्या टाइम्स)/थौं सुथय् भारतं वःपिं छथ्वः अज्ञात मनूतय्सं नेपाःया सीमा लागां १ किलोमिटर दुने लाःगु रुपन्देही जिल्लाया छगू नेपाली प्रहरी चौकीइ आक्रमण याःगु दु ।
अथे हे नीम्ह ति वःपिं थ्व भारतीयतय्सं नेपाःया रुपन्देहीया दक्षिण लागाय् च्वंगु मर्चवार धइगु थाय्या करौता प्रहरी चौकीइ अप्पां कयेकाः आक्रमण याःगु खः।
भारतीय मनूत वयाः अथे आकाझाकां आक्रमण यायेवं नेपाःया प्रहरीतय्सं तनावपूर्ण अवस्थायात नियन्त्रणय् कायेत छुं राउण्ड हवाई फायर समेत याःगु खः ।
प्रहरी चौकीइ जुयाच्वंगु थ्व आक्रमण खनाः तम्वःपिं आपालं नेपाली नागरिकत अन मुं वयेवं तिनि स्थिति नियन्त्रणय् वःगु खँ धाःगु दु। आक्रमण शुरु जुइवं अन मुं वःपिं सलंसः नेपाःमित नापं प्रहरी समेत जानाः उपिं भारतीय आक्रमणकारीतय्त अनं लिना छ्वःगु खः। बिसिउँ वंपिं आक्रमणकारीत सीमा पुलाः भारतपाखे हे वंगु खः।
घटना विवरण कथं थौं सुथय् भारतं खाद्यान्न ज्वनाः छम्ह भारतीय नागरिक नेपाःपाखे वयाच्वंगु जुयाच्वन। नेपाःया गस्ती प्रहरी खनेवं उम्ह भारतीय मनू थम्हं ज्वना वःगु सामान त्वःताः भारतपाखे बिसिउँ वन। भचा लिपा वहे बिसिउँ वंम्ह मनुखं ब्वना हःपिं सलंसः भारतीयतय्सं नेपाली प्रहरी चौकीइ आक्रमण याःगु खः ।
आक्रमणकारीतय्सं अप्पां कयेका प्रहरी चौकीइ आकाझाकां आक्रमण यायेवं अनया वातावरण तनावपूर्ण जूगु खः ।
नेपाःया चौकीइ आक्रमण याःपिं थ्व भारतीयत वास्तवय् सु खः धइगु खँ धाःसा सी मदुनि। इपिं नेपाः भारत सीमा लागाय् आपराधिक गतिविधि याना जुइपिं जुइफु धाःगु दु।
घटनायात कयाः नेपाःया प्रहरीं माःगु छानविन यायेगु नापं भारतीय सुरक्षाकर्मीतलिसे स्वापू तयेत स्वयाच्वंगु दु। उगु घटना लिपा अनया अवस्था थुइकेत प्रहरी नायब उपरिक्षक भोज विक्रम शाह उखेपाखे वंगु दु ।
