न्हूदँ हनेत नेवाःतय् थःथःगु कथंया नारा

श्रीकृष्ण महर्जन

नेपाल संवत्या आन्दोलनया झ्वलय् नेवाःतय्सं परम्परागत रुपं थ्वयेका वयाच्वंगु नारा धैगु 'भाषा म्वाःसा जाति म्वाइ नेपाल संवत राष्ट्रिय सवत्' खः ।

आः नेपाल संवत राष्ट्रिय संवत घोषणा याये धुंकूगु दु अले नेपाः संघीय गणतान्त्रिक नेपाः जुइ धुंकूगु अवस्थाय् पुलांगु नारा थ्वयेकेगु ई कथं मल्वइगु स्वाभाविक हे खः । थ्व इलय् स्वनिगलय् जक हे स्वंगू दर्जनं मल्याक न्हूदँ समारोह समिति नीस्वना थुगुसी नेपाल संवत ११३१ न्हूदँ तःजिक हनेगु नितिं थाय् थासय् तयारी यानाच्वंगु दु ।

गुलिं गुलिं न्हूदँ समारोह समितिं नारा तयार याये फयाच्वंगु दुसा गुलिं गुलिं खलः पुचः व न्हूदँ समारोह समितिपाखें न्हूगु कथंया नारा तयार याये धुंकूगु दु ।
येँया नेपालभाषा मंकाः खलःपाखें दयेकूगु न्हूदँ समारोह समिति ११३१ पाखें न्हूदँया नितिं धकाः न्हूदँया भिंतुना स्वायत्त राज्यया कामना नारा तयार याःगु दु । अथे हे नेवाः राष्ट्रिय मुक्ति मोर्चा नेपाः पाखें न्हूगु संविधान व न्हूगु संघीय नेपाःया नितिं न्हूदँया भिंतुना धकाः नारा तयार याःगु दु । अथे हे नेवाः देय् गू नेपाल मण्डलपाखें राष्ट्रिय एकताया नितिं संघीयता नेवाः स्वायत्त राज्य झीगु तातुना धकाः नारा तयार याःगु दु ।

उलि जक मखु थाय् थासय् च्वंगु न्हूदँ समारोह समितिं तकं थःथःगु पहलं न्हूदँया नारा तयार यानाः वनाच्वंगु दु । छखे न्हूदँ धैगु नेवाःतय्गु नापं आदिवासी जनजातिया अधिकारया आन्दोलन नं खः धायेगु अले मेखे देय्न्यंकं ला त्वःति स्वनिगलय् हे छगू नारा तयार याये मफुगु अवस्था ब्वलन । थथे अवस्था ब्वलंगुया मू कारण धैगु न्हूदँ हनेगु नितिं नेवाःतय्गु आधिकारीक निकाय व नेवाः आन्दोलन नापं नेपाल संवतया आन्दोलनया न्ह्यलुवाः तय्सं केन्द्रीय स्तरया न्हूदँ समारोह समिति दयेके मफुगुलिं हे खः धाःसां छुं पाइमखु ।