थौं नं राजनीतिक कार्यदलया मुँज्या
येँ (झीगु स्वनिगः)
संविधान निर्माणया झ्वलय् जुयाच्वंगु विवादयात ज्यंकेत नीस्वंगु उच्च स्तरीय राजनीतिक कार्यदलया म्हिगः विहीवाः च्वंगु मुँज्यायात थौं नं निरन्तरता बिइगु जूगु दु । थौं कार्यदलया मुँज्या च्वने न्ह्यः मूमू राजनीतिक दलया शीर्ष नेतातय्गु विवाद जुयाच्वंगु खँयात गुगु कथं ज्यंके फै धकाः ब्यागलं कथंया मुँज्या च्वनीगु जूगु दु । अनंलिपा थौं हे च्याताः इलंनिसें कार्यदलया मुँज्या जुइ ।
थौया कार्यदलया मुँज्याय् नं आः ल्यंदनिगु विवादया विषयसं सहलह जुइ धकाः धाःगु दु ।
थ्व हे दथुइ म्हिगः जूगु मुँज्याय् कार्यदलया कजि एकीकृत माओवादीया नायः पुष्पकमल दाहल प्रचण्डयात आः तकया दुने कार्यदल व कार्यदलया नितिं ग्वाहालि यायेत नीस्वंगु ग्वाहालि पुचःपाखें तयार याःगु खँ कनेगु ज्या जूगु खःसा नेपाली कांग्रेसया केन्द्रीय कमिटीया मुँज्या जूगुलिं थ्यं मथ्यं साढे १ घण्टा जक मुँज्या च्वनाः थौं तकया नितिं स्थगित याःगु खः ।
