भारतीय तस्करतय्सं नेपाःया चौकीइ आक्रमण
येँ (झीगु स्वनिगः)
नेपालय् भारतपाखें हस्तक्षेप यानाच्वन धकाः राजनीतिइ चर्चा जुयाच्वंगु नापं नेपाःया राजनीतिया प्रमुखतय्त चीनं लगातार चीन भ्रमणय् सःताच्वंगु इलय् भारतया तस्करतय्सं नेपाःया प्रहरी चौकीइ आक्रमण याःगु दु ।
रुपन्देहीया दक्षिण लागाय् च्वंगु मर्चवारया करौता गाविसय् च्वंगु मुदिला प्रहरी चौकीइ म्हिगः विहीवाः सुथय् आक्रमण याःगु खः ।
छपुचः तस्करतय्सं आक्रमण यायेवं चौकीइ च्वंपिं नेपाःया प्रहरीतय्सं स्थितियात नियन्त्रणय् कायेत हवाई फायर तकं याःगु खः ।
तस्करतय्सं चौकिइ अप्पां कयेका आक्रमण याये धुनेवं अन तनावपूर्ण वातावरण ब्वलंगु खःसा उधि्रमय् हे स्थानीय नेपाःमित नं छथासं मुनाः नेपाःया प्रहरी नाप जानाः भारतया तस्करतय्त लिना छ्वयेगु ज्या जूगु खः ।भारतं वःपिं आक्रमणकारीत नेपाःमि जनता व नेपाःया प्रहरीत खनाः ग्यानाः भारतपाखे हे बिस्युं वंगु खः ।
घटना विवरण कथं म्हिगः विहीवाः सुथ न्हापां भारतया तस्कर सामान ज्वनाः भारतं नेपाःपाखे वयाच्वंगु खः । अबले गस्तीइ वनाच्वंपिं नेपाःया प्रहरीत खनेवं उम्ह तस्कर सामान हे त्वःताः भारतपाखे बिस्युं वंगु खः ।
अनं भच्चा लिपा हे भारतं छपुचः तस्करत वयाः नेपाःया उगु प्रहरी चौकीइ आकाझाकां आक्रमण याःवःगु खः ।
भारतीय तस्करतय्सं आक्रमण याःगु नेपाःया रुपन्देहीया दक्षिण लागाय् च्वंगु मर्चवारया करौता गाविसय् च्वंगु मुदिला प्रहरी चौकीइ धैगु नेपाः भारत सीमानां थ्यं मथ्यं १ किलो मिटर नेपाः दुने लाःगु खः ।
अथे नेपालय् हे च्वंगु प्रहरी चौकीइ तकं भारतीयतय्सं गुगु कथं आक्रमण याःवल उकियात कयाः नेपाःमितय्सं गम्भीर रुपं कायेमाःगु नापं नेपाःया सरकारं भारतलिसे खँ ल्हायेमाः धकाः मनूतय्सं धयाहइगु स्वभाविक हे खः । गोलीं कयेकाः स्यानाबिल, जनकपुरय् म्हिगः महत्तोरी शिक्षा कार्यालयया नायव सुब्बा लालकिशोर झायात भूमिगत पुचलं आक्रमण यानाः स्यानाब्यूगु दु ।
गोलीं कयाः घाःपाः जूम्ह झायात अन वासः याये मफैगु अवस्था ब्वलंगुलिं येँया महाराजगाजय् च्वंगु टिचिङ अस्पतालय् वासः यायेत हःगु खःसा अन थ्यनेवं हे चिकित्सकतय्सं झा मदये धुंकूगु धकाः घोषणा याःगु खः । म्हिगः सुथय् थःगु ज्याकू वनेत्यंगु इलय् अथे झायात आक्रमण याःगु खः ।
उगु घटनालिपा राजन मुक्तिं नेतृत्व यानाच्वंगु जनतान्त्रिक तराई मोर्चा नांगु सशस्त्र भूमिगत पुचःया नेता धइम्ह उज्वल मुक्तिं स्थानीय संचारकर्मीतय्त फोन यानाः जिम्मेवारी काःगु दु ।
