न्हूदँया मोटरसाइकल र्याली सिक्किम वनेगु तयारी
३० दँ न्ह्यः नेपालभाषा मंकाः खलःया ग्वसालय् शुरु जूगु नेपाल संवतया न्हूदँ झःझः धायेक हनेगु ज्या थौं तक नं निरन्तर रूपं न्ह्यानाच्वंगु दु । थीथी संघ संस्थां, देश व विदेशय् नं थौं तकनं तःजिक हे न्हूदँ हनावयाच्वंगु दु ।
न्हूदँया लसताय् थीथी संस्थाया ग्वसालय् थीथी थासय् मोटरसाइकल र्याली नं यानावयाच्वंगु दु । थ्वहे झ्वलय् थुगुसी नेपाल संवत् ११३१ न्हूदँया लसताय् नेवाः भोलेन्टरियर्सया ग्वसालय् जुइगु मोटरसाइल र्याली चाहिं न्हापालिपा स्वयाः बिस्कं न्ह्याकेत्यंगु दु । थुगुसीया मोटरसाइकल र्याली नेपाःगालं पिने जःलाखःला देय् भारतया सिक्किमय् वनेगु कथं ज्या न्ह्याकाच्वंगु दु ।
थुकीया लागि छगू पुचः वंगु शनिवाः सिक्किम वंगु खःसा वयकपिं थौं येँय् लिथ्यंगु दु । भाजु गणेशराम लाछिजुया नेतृत्वय् नेवाः भोलेन्टरियर्सया नायः भाजु मनोज नेवाः नापं प्यहेसिया पुचः उखे झाःगु खः ।
सिक्किमय् सिक्किम नेवार संगठनया नायः रोहित प्रधान व मूछ्यांजे भाजु दिलु प्रधानलिसे मोटरसाइकल र्यालीया खँय् सहलह जूगु खः । नापं सिक्किम सरकारया युवा खेलकुद् व शिक्षामन्त्री भाजु एन. के. प्रधानलिसे नं सहलह जूगु गणेशराम लाछिजुं नेपालमण्डलयात जानकारी बियादिल ।
र्यालीयात सिक्किमय् सिक्किम नेवार संगठनं भव्य लसकुस याइगु जूगु दु । थुकीया नापं सिक्किमय् नेवाः भायया विकासय् ज्या यानाच्वंम्ह छम्हसित येँय् नं वनीगु पुचलं व येँय् नं वनीम्ह छम्हसित सिक्किम नेवार संगठनं छगू ज्याझ्वःया दथुइ मंकाःकथं हनेगु क्वःछ्यूगु दु ।
र्याली न्हापांगु दिं येँय् नं वनां इटहरी च्वनीगु ज्याझ्वः दु । अनं कन्हय कुन्हु कालिम्पोङ्ग जुयाः सिक्किम थ्यंकी । सिक्किमय् च्वनेगु व नकेगुया जिम्मा सिक्किम नेवार संगठनं याइ । अनं दार्जिलिङ्ग-इलाम-चारआलि-सिन्धुलीया न्हूगु लँ जुया धुलिखेल पिचायेका येँय् थ्यंकीगु कथं रुटया अवधारण दयेकूगु दुसाः थ्व रुट व र्याली वनेगु तिथिमिति चाहिं क्वःहे छ्यूगु धाःसा मदुनि ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
