पुलांपिं जुजुपिनिगु नामं दयेकातःगु गुथि खारेज याइगु
येँ (झीगु स्वनिगः)
नेपाः संघीय गणतान्त्रिक मुलुक जुइ धुंकूगु अवस्थाय् आः पुलांपिं जुजुपिनिगु किपाः दुगु ध्यबा खारेजु यायेगु तयारी जुयाच्वंगु दुसा लिपांगु इलय् वयाः व हे पुलांपिं जुजुपिनिगु नामय् पलिस्था यानातःगु गुथित तत्काल हे खारेज याइगु जूगु दु ।
पुलांपिं जुजुपिनिगु नामं पलिस्था यानाःगु गुथित ल्यंकातयेगु धैगु गणतन्त्रवादीतय्गु नितिं मछालेपुसे च्वंगु जुयावःगुयात महसूस यानाः आः याकनं हे सरकारं उगु कथं ज्या न्ह्याकेत्यंगु खः ।
म्हिगः बुधवाः छगू ज्याझ्वःया दथुइ वर्तमान कामचलाउ सरकारया भूमिसुधार व ब्यवस्था मन्त्री डम्बर श्रेष्ठं अथे पुलांपिं जुजुपिनिगु नामं पलिस्था यानातःगु गुथित याकनं हे खारेज यायेगु जुइ धकाः जानकारी बियादीगु दु । वय्कलं आः नेपाःमि जनतां श्री ५ या नामं छुं नं कथंया करपुलेमालीमखुत धयादिसें उकिया अन्त्य यायेगु जुइ धकाः नं धयादिल ।
एमालेया पोलितब्यूरो दुजः गंगालाल तुलाधरं पुलांपिं जुजुपिनिगु नामं दयेकातःगु गुथि मन्त्रीस्तरीय निर्णयपाखें चीकेमफैगु दावी यानादिल । वय्कलं धयादिल 'राजतन्त्र वायू जुयाः वइगु ई जुइ धुंकल अय्नं इमिगु नामं तिरो पुलेमाःगु थ्व तसकं मछालेपुसेच्वंगु खँ खः ।'
