माइक्रोबसय् बम विष्फोट
१५ म्ह यात्रु मध्ये ४ म्ह घाःपाः
येँ (झीगु स्वनिगः)
भैरहवां बुटवलय् वनाच्वंगु माइक्रोबय् म्हिगः सनिलय् बम विष्फोट जुयाः प्यम्ह मनूत बांमलाक्क हे घाःपाः जूगु दु । भैरहवां बुटवलपाखे वानाच्वंगु लु १ ख ६६९४ नम्बरया माइक्रोबस म्हिगः सनिलया पौने ५ बजे रुपन्देहीया शंकरपुरय् थ्यनेवं बम विष्फोट जूगु खः धकाः अनया प्रहरीं न्ह्यथंगु दु ।
उगु विष्फोटनय् लानाः माइक्रोबसय् च्वना वंपिं कपिलबस्तु गजेडाया देउमाया भुजेल बुटवल नगरपालिका वडा नं। १२ या सुनीता पौडेल रुपन्देही पर्रोहाया शिव शर्मा व हेटौंडाया कुन्दन श्रेष्ठ तसकं घाःपाः जूगु दु । घाःपाः जूपिन्त लुम्बिनी अञ्चल अस्पतालय् वासः यायेगु ज्या जुयाच्वंगु दु । उगु घटना लिपा सुरक्षाकर्मीतय्सं भैरहवा सतक खण्डय् ब्यापक रुपं खोजतलास न्ह्याकूगु दु ।
थ्व हे दथुइ उगु विष्फोटनया जिम्मा तराई लागाय् सशस्त्र संघर्ष यानाः वयाच्वंगु भूमिगत पुचः जनतान्त्रिक तराई मधेस मुक्ति मोर्चां स्थानीय संचारकर्मीतय्त फोनयानाः जिम्मेवारी काःगु दु ।
