नेवाः राजनीतिक सम्मेलनया तिथि हिलेगु तयारी
येँ (झीगु स्वनिगः)
संघीय गणतान्त्रिक नेपालय् नेवाः स्वायत्त राज्य धकाः न्हूगु संविधानय् च्वकेगु नितिं आन्दोलन यानाः वयाच्वंगु नेवाः स्वायत्त राज्य मंकाः संघर्ष समितिं नेवाः राष्ट्रिय राजनीतिक सम्मेलनया तयारी ज्या न्ह्याकूगु दु लिसें सम्मेलनय् ब्वति काइपिनिगु ल्याः अप्वइगु सम्भावनाया कारणं सम्मेलन यायेगु थाय् व तिथि हिलेत्यंगु खँ जिमिगु सुत्रं जानकारी ब्यूगु दु ।
थ्व हे झ्वलय् म्हिगः नेवाः राष्ट्रिय राजनीतिक सम्मेलन आर्थिक संयोजन समिति नं नीस्वंगु दु । उगु संयोजन समितिया कजि हितमान शाक्य जुयादीगु दुसा दुजलय् राजेन्द्र श्रेष्ठ, डा. मंगलसिद्ध मानन्धर, भिमसेनदास प्रधान, तिर्थराम डंगोल, दिलिप महर्जन, बुद्ध साय्मि, पुष्पमान श्रेष्ठ, सुजिब बज्राचार्य, राजेन्द्रमान शाक्य व विजयरत्न बज्राचार्य च्वनादीगु दु ।
नेवाःतय्गु आन्दोलन च्वन्ह्याकेत नापं नेवाः स्वायत्त राज्यया सुनिश्चित यायेगु नितिं नेवाः राष्ट्रिय राजनीतिक सम्मेलन वइगु मंसीर १७ व १८ गते याइगु संभावना अप्वया वःगु दु । उकिया नितिं आः वइगु कार्तिक १२ गते च्वनीगु संघर्ष समितिया मुँज्यां औपचारिक निर्णय यायेत्यंगु जानकारी वःगु दु ।
थ्वसिबें न्ह्यः नेवाः स्वायत्त राज्य मंकाः संघर्ष समितिं मंसीर १० व ११ गते उगु नेवाः राष्ट्रिय राजनीतिक सम्मेलन यायेगु धकाः खँ क्वःछ्यूगु खः ।
सूत्रं धाः कथं थाय्या समस्या जुयाः हे अथे नेवाः राजनीतिक सम्मेलनया तिथि हिलेगु तयारी याःगु खः ।
उगु सम्मेलनय् देय्न्यंकंयान ७० गू जिल्लाया नेवाःतय्गु प्रतिनिधित दुथ्याइ धकाः धाःगु दु । सम्मेलनय् संघीय गणतान्त्रिक नेपाः दुने नेवाः स्वायत्त राज्य नेवाः आन्दोलन नेवाःतय्गु समस्या नापं थीथी विषययात कयाः सहलह ब्याकाः न्हूगु कथंया आन्दोलनया नितिं तयारी नं याइ धकाः धाःगु दु ।
